Според Европскиот центар за превенција и контрола на болести (ECDC), сезоната на комарци станува „подолга и поинтензивна“ поради растот на температурите, поблаги зими и промени во режимот на врнежи – услови кои создаваат совршена средина за размножување на комарците и ширење на опасни вируси.

Научниците за здравје и клима дополнително предупредуваат дека, како резултат на климатските промени, овие болести би можеле да станат ендемски во Европа.

„Европа влегува во нова фаза – период во кој подолг, поширок и поинтензивен пренос на болести што ги пренесуваат комарците станува новото нормално“, изјави директорката на "ECDC", Памела Ренди-Вагнер.

Рекорден број случаи

Досега во 2025 година се регистрирани 27 избивања на чикунгуња – нов рекорд за континентот, соопшти агенцијата. Исто така, забележани се 335 случаи на вирусот Западен Нил, најмногу во последните три години.

Комарецот Aedes albopictus, познат како азиски тигар-комарец, кој го пренесува вирусот чикунгуња, денес е присутен во 16 европски држави и 369 региони – во споредба со само 114 региони пред една деценија.

Инфекциите со вирусот Западен Нил, пак, секоја година се појавуваат во нови области. Во 2025 година тоа го вклучува романската жупанија Салаж и италијанските покраини Латина и Фрозиноне, каде од вирусот починаа најмалку 10 лица.

„Како што се менува пејзажот на болестите што ги пренесуваат комарците, сè повеќе луѓе во Европа ќе бидат изложени на ризик“, предупреди д-р Селин Госнер од "ECDC".

Симптоми и ризици

Повеќето заразени со вирусот Западен Нил немаат симптоми, но кај дел од нив може да се појават опасни компликации како енцефалитис (воспаление на мозокот) или менингитис (воспаление на мозочните обвивки).

Чикунгуња, пак, може да предизвика треска, мачнина, главоболка, замор, осип, болки во мускули, оток и болки во зглобови кои можат да бидат долготрајни и исцрпувачки.

Во моментов нема специфични лекови за овие вируси. Во Европската унија се одобрени две вакцини против чикунгуња, но вакцина против вирусот Западен Нил сè уште не постои.

Превенцијата е клучна

Госнер нагласи дека државите мора да „ја зајакнат и прошират примената на ефикасни и еколошки прифатливи интервенции за контрола на комарците“.

Граѓаните, исто така, можат да преземат мерки за да го намалат ризикот од убоди: употреба на репеленти, носење долги ракави и панталони наутро и навечер, користење клима-уреди, вентилатори, мрежи над креветите и заштитни мрежички на прозорците.