„Кери 27 години беше моето професионално отчукување на срцето“

Паркер на Инстаграм објави емотивно писмо во кое им се заблагодарува на сите што заедно со неа ја создаваа серијата, но и на гледачите кои со децении ја сакаа и навиваа за Кери, иако понекогаш и ја осудуваа.

„Кери Бредшо доминираше во мојот професионален живот 27 години. Мислам дека јас ја сакав најмногу од сите. Знам дека и другите ја сакаа. Беа фрустрирани од неа, навиваа за неа. Таа симфонија од емоции беше најважниот сопатник. Засекогаш сум благодарна“, напиша Паркер, потврдувајќи дека „ова поглавје е завршено“.

Додала и дека таа и креаторот на серијата, Мајкл Патрик Кинг, заеднички одлучиле „And Just Like That“ да не добие нова сезона. Серијата, истакнала, била „радост, авантура и најубавата форма на тежок труд“ во соработка со неверојатен тим и повеќе од 380 членови на продукцијата.

„Се предаде на шеширите, книгите, чевлите, пријателките и на ветувањето на новиот ден во својот сакан град и на луѓето што најмногу ги ценеше. Го носеше срамот, гордоста, честа, оптимизмот и буквално безброј фустани и здолништа. Се држеше за раце, за надеж, и за најдоброто од луѓето“, додала актерката за својот лик.

Што се случуваше во продолжението?

„And Just Like That“ повторно ги обедини Кери, Миранда и Шарлот во современиот Њујорк, но без Саманта (Ким Катрал), која се појави само во кратка сцена на крајот од втората сезона. Серијата се обиде да балансира помеѓу носталгијата и современите општествени теми, но реакциите од публиката и критиката беа поделени. Некои го пофалија освежениот пристап и новите ликови (Сима, LTW), додека други ги критикуваа дијалозите, наметнатиот тон и наративната дезориентираност.

Сепак, гледаноста беше солидна, а крајот на третата сезона остави можност за продолжение – кое, сепак, нема да се случи.

Серија која обликуваше генерации

Оригиналната серија „Sex and the City“ се емитувала на „HBO“ од 1998 до 2004 година, низ 6 сезони и 94 епизоди. Освои 7 Еми награди, 8 Златни глобуси и милиони обожаватели ширум светот. Следеа и два филма (во 2008 и 2010 година), а потоа и продолжението во форма на „And Just Like That“, кое започна во 2021 година.

Серијата беше револуционерна за своето време – отворено зборуваше за женската сексуалност, пријателството, модата и модерните предизвици на животот во голем град. Кери, Миранда, Шарлот и Саманта станаа икони на поп-културата, а Њујорк – петтиот главен лик.

26 години по првата епизода, целата приказна – барем засега – добива свој крај