Светот на колекционерските автомобили со нетрпение го очекува август, кога на престижната аукција на куќата "RM Sotheby’s" во Монтереј ќе биде понуден навистина уникатен автомобил – "Ferrari F50" од 1995 година. Но, ова не е обичен "F50". Првиот сопственик на автомобилот бил модниот магнат Ралф Лорен, страстен љубител на автомобили чија импресивна колекција е позната ширум светот.
Наследникот на легендата "F40"
"Ferrari F50" беше претставен во 1995 година како наследник на култниот модел "F40", создаден за да се одбележи 50-годишнината од основањето на компанијата. Произведен е во исклучително ограничена серија од само 349 примероци, што го прави значително поредок од својот претходник. Во моментот на претставувањето, "F50" претставуваше технолошки врв на понудата на "Ferrari" – автомобил што нуди искуство на Формула 1 за обична патна употреба.
Срцето на овој автомобил е 4.7-литарски атмосферски V12 мотор, чија архитектура директно потекнува од моторите користени во болидите на Формула 1 до 1993 година. За патната верзија, инженерите го намалиле максималниот број вртежи од вртоглави 15.000 на сè уште импресивни 8.500 во минута, додека зафатнината е зголемена од 3.5 на 4.7 литри.
Резултатот е моќност од 520 коњски сили и вртежен момент од 471 Nm, што му овозможувало на F50 забрзување од 0 до 100 km/h за само 3.9 секунди и максимална брзина од 325 km/h. Се проценува дека цената ќе ги сруши сите досегашни рекорди и ќе достигне износ меѓу 5.5 и 6.4 милиони евра.
