„Renault“ продолжува со низата успешни соработки со современи дизајнери, преку кои ја промовира својата марка и нејзиното богато наследство. Најновиот проект му беше доверен на американскиот уметник Џошуа Видес, на кого му беше дадена целосна слобода во редизајнот на новиот модел „Twingo E-Tech electric“. Неговата интервенција го претвори ова електрично возило во оригинално уметничко дело кое ја спојува автомобилската индустрија со современиот визуелен израз.

Оптичка илузија

Видес го примени својот препознатлив стил на каросеријата на возилото, трансформирајќи го во објект што изгледа како скица. Неговата монохроматска естетика, инспирирана од стрипови и анимирани филмови, користи јасно дефинирани контури за визуелно да го врати тродимензионалниот објект во светот на 2Д илустрацијата. Со овој пристап, „Twingo“ престанува да биде само индустриски производ и станува уметничко дело – како да излегло директно од страниците на стрип.

Процесот на создавање на оваа инсталација се одвиваше во живо во просторот на „Renault Carwalk“ од 8 до 13 април. Во текот на тридневната работа, уметникот пред посетителите го трансформираше автомобилот, овозможувајќи ѝ на јавноста увид во процесот на создавање. По завршувањето на перформансот, уникатниот „Twingo“ стана централен дел од изложбата „Pop Art Car“ и ќе остане изложен на париските Елисејски полиња до 9 јуни.

Дел од уметничка колекција

По завршувањето на изложбата во „Renault Carwalk“, креацијата на Видес ќе стане дел од официјалната уметничка колекција „Renault Fund“. Оваа колекција е основана пред неколку години со цел да се истражи автомобилот како медиум за современо изразување. Преку ваквите соработки, брендот настојува да ги истражи границите меѓу уметноста и функционалните објекти, истовремено промовирајќи го автомобилот како платформа за слободно творештво.