Ресторанот, кој се наоѓа на познатата плажа Платис Џалос, се рекламира како „луксузна дестинација за оние кои бараат посебни моменти на опуштена осаменост“, но многу гости тврдат дека зад таа слика стои агресивна продажба и неправедно наплаќање, пренесе „Дејли мејл“.

350 евра за една риба

Корисничка на „TripAdvisor“ по име Џесика Л. го опиша своето искуство како „најлошо на Миконос“. Во рецензија со една ѕвезда, рече дека таа и нејзините пријатели платиле повеќе од 1.000 евра за три јадења. „Плативме 350 евра за цела риба и вкупно 1.000 евра за три јадења. Најлошото искуство на Миконос. Дури и во „Скорпиос“, кој е еден од најскапите ресторани, не плативме толку многу за вечера за пет лица – со предјадење, главно јадење и десерт“, напиша таа.

Иако ресторанот во менито ја наведува цената од 24,80 евра за 100 грама орада, многу гости тврдат дека персоналот не ги предупредува колку навистина ќе чини рибата, туку дури кога ќе добијат сметка дознаваат дека се наплаќа по грам – и тоа без претходно знаење.

Искуства на други гости

Други посетители споделија слични искуства. Една корисничка, Сју, го опиша ресторанот како „шокантна измама“. Таа рече дека келнерот им донел дополнителен пијалак што не го нарачале, презентирајќи го како „подарок“. „Изгледаше пријателски… сè додека не се појави на сметката“, напиша таа. Вкупно, им биле наплатени 400 евра за неколку алкохолни и безалкохолни пијалаци, вклучувајќи 35 евра за Кока-Кола.

Друга гостинка, Амрита, која го посетила ресторанот во јуни 2024 година, рече дека била намамена со понудата со бесплатни лежалки. Откако ѝ било дадено менито, таа нарачала риба, но персоналот не ѝ објаснил дека рибата се наплаќа според тежината на целото парче. „Дознавме дури кога ја донесоа сметката од 400 евра. Послужената риба имаше над еден килограм“, рече таа.

Бесплатни лежалки со високи цени

Трета гостинка, Габриела, го обвини ресторанот за кражба. „Нè убедија да нарачаме пиво кое чинеше 35 евра, а потоа веднаш ја донесоа сметката, како да сакаа веднаш да платиме и да си одиме“, напиша таа.

Друг посетител ги предупреди идните гости да „го избегнуваат ресторанот по секоја цена“. Тој рече дека лежалките и ручекот првично чинеле 35 евра, но откако додале две шишиња вода и Кока-Кола, цената се зголемила за дополнителни 51 евро. Им биле наплатени и 5 евра за кечап и 18 евра за мала порција помфрит.

Ресторанот „DK Oyster“, сместен веднаш до морето и кој нуди луксузни лежалки со поглед, се чини дека им се „обраќа“ на побогатите гости. Сепак, бројни гости истакнуваат дека високите цени и неочекуваните трошоци целосно го засениле искуството.

Кој е сопственикот?

Во јули 2024 година, „MailOnline“ објави и дополнителни информации за сопственикот на ресторанот, Димитрис Каламарас, по чии иницијали е именуван ресторанот. Каламарас на социјалните мрежи отворено прикажува луксузен животен стил, а според порталот, заработува огромни суми од туристите кои нарачуваат без претходно да ги проверат цените.

„DK Oyster“ веќе се најде во центарот на јавна критика, кога новинарскиот тим на „MailOnline“ откри дека им биле наплатени дури 121 евро за три мали ракчиња.