Со почетна цена од половина милион долари и рачна изработка во Њујорк, "Dacora Motors" има за цел да го раздрма светот на луксузните електрични возила. Нивниот нов модел веќе го привлекува вниманието како потенцијална конкуренција на "Cadillac Celestiq", иако старт-апот се најде под лупа поради тврдењето дека ова е „првото ултралуксузно возило произведено во Америка во последните сто години“.

Сепак, возилото на "Dacora" изгледа како создадено од вештачка интелигенција – како ултралуксузна верзија на "Volkswagen Beetle". Според информациите, дизајнот е развиен во соработка со славната италијанска дизајнерска куќа "Pininfarina".

Автомобилот се потпира на ретро естетика од 1930-тите – стилот „Streamline Moderne“. Има рачно изработена дрвена хауба, кружни предни светла, нагласени браници, ретро фелни, затворени задни тркала и задни светла што потсетуваат на млазни мотори. Клиренсот е како кај "SUV" – дури 191 милиметар.

Луксузна кабина за сите сетила

Ентериерот е минималистички, без пластика – доминираат дрво, ткаена волна и нетоксична биокожа. Екраните се скриени зад полупроѕирни дрвени панели и се проектираат директно врз површините. Кабината е модуларна и може да се приспособува според сезоната – волна за зима, лен за лето, со сезонски материјали во лимитирани изданија.

Купувачите можат да изберат конфигурации од три до седум седишта. Достапни се и екстравагантни опции, како работен простор во задниот дел, интегрирана еспресо машина, па дури и бонсаи градина под стаклена купола. Се разбира, вклучени се и сефови со биометриска заштита, како и мини фрижидери.

Електричен или хибриден погон

Иако техничките спецификации сè уште не се финализирани, "Dacora" најавува преку 800 коњски сили и автономија до 644 километри. Забрзувањето од 0 до 100 km/h трае помалку од 4 секунди, а вкупната маса на возилото изнесува 2.948 килограми.

Ќе биде достапна и хибридна верзија, но без прецизни информации за сега.

Секој примерок ќе се склопува рачно во погонот „Hudson Valley Garage“ на имот од 100 хектари во сојузната држава Њујорк. Почетната цена изнесува 500.000 долари, а резервациите се веќе отворени со депозит од 50.000 долари, пренесува "B92".

Иако сè уште нема официјални бројки, компанијата тврди дека веќе примила 150% повеќе резервации од бројот на возила што планира да ги произведе во првата година.