Според локалните медиуми, она што се случува на Капри на почетокот од летната сезона може да се опише со еден збор: опсада. Во последниве години, бројот на туристи таму се зголемил за 24 отсто, достигнувајќи три милиони годишно. Забележано е дека на секои три часа на островот во Неаполскиот залив пристигнуваат 12.000 луѓе.

Капри се бори против масовниот туризам

Пресметано е дека 91% од туристите доаѓаат таму само за неколку часа и нивното присуство предизвикува хаос и редици насекаде. Капри има најголема густина на туристи во Италија.

Таа изнесува над 1.200 луѓе на квадратен километар, повеќе отколку во Рим, Фиренца или дури и Венеција. Дозволениот праг треба да биде не повеќе од 1.000 луѓе, и тоа за копно, а не за остров со толку разновидна структура.

„Ситуацијата стана неподнослива и секоја година станува сè подраматична“, предупреди локалниот дневен весник и истакна дека бројот на туристи насекаде далеку го надминува капацитетот на островот, а повеќе не е можно нормално да се оди поради метежот.

Градоначалникот на Капри, Паоло Фалко, веќе неколку години се обидува да се справи со феноменот на прекумерен туризам. Исто така тој ѝ се обрати и на министерката задолжена за овој сектор, Даниела Сантанче, но засега нема никакви резултати. Најави дека ќе разговара и со министерката за внатрешни работи бидејќи, како што објасни, јавната безбедност е загрозена.