Роверот "Curiosity" неуморно го истражува кратерот Гејл на Марс уште од 2012 година, откривајќи древни тајни за водата и геологијата на Црвената планета. На неодамнешна фотографија од орбиталниот сателит "Mars Reconnaissance Orbiter" (MRO), "Curiosity" се гледа како мала црна точка со сив траг зад себе, што ја истакнува неговата осаменост во бескрајната марсовска пустелија.

Траг кој наскоро ќе исчезне

"MRO" го сними "Curiosity" на 28 февруари, додека преминуваше патека од околу 320 метри преку 11 поединечни возења започнати на 2 февруари. Но, силните марсовски ветрови наскоро ќе ги избришат тие траги. Иако 320 метри не звучат многу, "Curiosity" со својата максимална брзина од само 160 метри на час — околу четириесет пати побавно од просечното човечко одење — сепак успева да ја направи оваа дистанца значајна.

Бавното движење помага во зачувување на енергијата и обезбедување безбедна навигација на тешкиот терен на Марс. Роверот е тежок и се напојува со нуклеарен генератор со моќност од 110 вати. Во речиси 13 години, "Curiosity" има поминато само 34,59 километри на површината на Марс.

Во февруари годинава, "Curiosity" се движеше низ каналот Гедиз Валис во кратерот Гејл, кој, според научниците, веројатно настанал по големи поплави. Таму откри џеб со чист сулфур, чија важност научниците сè уште ја истражуваат.

По напуштањето на каналот, роверот се искачи на ридот наречен Ѓаволската порта (Devil’s Gate), спроведе хемиски анализи на локациите Кахуила и Санта Инез и ја фотографираше слоевитата структура наречена Хејл Телескоп.

Следната мисија

"Curiosity" сега се упатува кон комплексните „boxwork“ формации на подножјето на планината Шарп. На Земјата, вакви формации настануваат со таложење минерали во пукнатини низ кои минувала подземна вода, а потоа остануваат изложени преку ерозија на карпите.

Научниците сакаат да ги анализираат тие минерали бидејќи тие се формирани во потопли и повлажни услови, кои биле попогодни за микробиолошки живот. Истражувањата на "Curiosity" можеби ќе нè приближат до откривање на траги од древен живот на Марс.