Автомобилот „Застава 101“, во народот познат како Стоеден или Кец, се произведуваше во Крагуевац од 1971 до 2008 година. Освен во поранешна Југославија, овој модел се возеше и во соседните земји, но и низ целиот свет.
„Застава 101“ беше создадена врз основа на тогаш технички многу модерниот „Фиат 128“, со малку изменет заден дел, и беше еден од првите автомобили произведени во денес најзастапената „хечбек“ варијанта.
Во тоа време, петте врати беа реткост, а покрај револуционерниот дизајн, „Застава 101“ беше популарна и поради поволната цена, пишува "BiznisKurir".
Овој модел брзо стана најпродаваното возило на „Застава“ во поранешна Југославија, а поради достапната цена, оствари значителен извозен успех, особено во источноевропските земји, но и низ целиот свет.
Колку би чинела денес?
Фејсбук страницата „Zastava 101 Forum“ објави извадок од "АВТО магазин" од 1972 година, во кој се наведува дека почетната цена на „Застава 101“ изнесувала 40.040 динари, односно 2.084 долари.
Ако се земе предвид инфлацијата во последните 50 години, денес „Застава 101“ би чинела точно 16.179 долари или 14.953 евра.
