По демантот на легендарниот хрватски скијач Ивица Костелиќ, во кој тој тврдеше дека не бил затрупан од лавина во Австрија и ги повика медиумите да не ја вознемируваат неговата фамилија, протекоа нови информации од Обертауерн, кои укажуваат на тоа дека поранешниот освојувач на Светскиот куп можеби не ја кажувал целосната вистина.

Неколку австриски медиуми објавија дека сакаат да докажат дека Костелиќ навистина бил на местото на несреќата.

„Бев во базен со децата кога ме затекна чудна вест, сите беа многу возбудени. Денес бев непосреден сведок на лавина во Австрија, во која, според моите сознанија, немаше жртви. Како и секој граѓанин, ги оставив своите податоци во процедурата по таков настан. Претпоставувам дека така моето име заврши во вестите“, објави Костелиќ на социјалните мрежи, откако во јавноста се појавија првите информации за случајот.

Австриските медиуми: Костелиќ навистина бил затрупан во лавината

Според австрискиот медиум "Kronen Zeitung", постојат многу индиции кои покажуваат дека Костелиќ бил затрупан во лавината.

Во нивниот текст се наведува дека дел од спасувачите се незадоволни, бидејќи поранешната скијачка ѕвезда не покажала благодарност по спасувачката акција.

„Никој службено не го споменува името ’Ивица Костелиќ‘. Но, зад затворени врати, приказната е сосема поинаква. Неговото однесување вознемири многумина – некои сметаат дека не покажал доволна благодарност кон храбрите спасувачи. Спасувачките служби уште еднаш ни потврдија во четвртокот дека 45-годишниот Хрват бил затрупан од лавината.“

Друг австриски портал, "Salzburger Nachrichten", исто така пишува дека според неколку независни извори, Костелиќ и неговиот 30-годишен пријател ја предизвикале лавината на 2150 метри надморска височина.