Фудбалот е спорт во кој рекордите се уриваат секојдневно, но она што го прави Казујоши Миура ги надминува границите на реалното.
Додека повеќето негови врсници одамна се во заслужена спортска пензија, овој Јапонец и на 59 години и натаму ги облекува копачките и излегува на теренот како професионалец.
Со неодамнешниот настап во јапонската лига, Миура уште еднаш го потврди статусот на најстар активен професионален фудбалер на планетата. Иако на теренот минал само неколку минути, тоа беше сосема доволно уште еднаш да го потсети светот на својата неверојатна долговечност и кариера што им пркоси на законите на биологијата.
За популарниот „Казу“, ова е 41. професионална сезона. Тајната на неговиот успех лежи во железната дисциплина и страста што не стивнува ни по четири децении борба за бодови.
Уште во март 2021 година, Миура поставил рекорд како најстар играч во историјата на Џеј-лигата со 54 години и 12 дена, кога влегол како замена против Урава Редс. Оттогаш, тој само продолжува да ја поместува границата што веројатно никој никогаш нема да ја достигне.
Неговата приказна е нераскинливо поврзана со подемот на јапонскиот фудбал. Кариерата ја започнал во Бразил, сакајќи да учи од најдобрите, а за репрезентацијата на „самураите“ одиграл 89 натпревари и го освоил Азискиот куп. Бил клучна фигура во првиот, историски пласман на Јапонија на Светското првенство во 1998 година во Франција, иако на крајот, со одлука на селекторот, не бил дел од конечниот состав.
Како играч на Кавасаки останал запаметен и во јавноста во тогашна Југославија. Играјќи за Јапонија, Миура во мај 1996 година бил единствениот стрелец против „Сините“ на Кирин купот.
Го совладал Александар Коциќ по истекот на еден час игра и расплакал многумина навивачи во поранешна Југославија.
