"Lancia" е еден од неколкуте брендови на "Stellantis" што се борат за опстанок. Години наназад, брендот беше ограничен само на италијанскиот пазар.

Но, со лансирањето на новата генерација "Ypsilon" во 2023 година, "Lancia" го прошири своето присуство надвор од Италија. По долго отсуство, брендот се врати во Франција, Шпанија, Белгија, Луксембург и Холандија, што најави можна преродба.

Во Италија, минатата година беа модернизирани 160 продажни салони, што требаше да го поттикне растот на продажбата. Но, резултатите се разочарувачки.

Според податоците на Европската асоцијација на производители на автомобили (ACEA), рестартирањето на брендот започна лошо – испораките паднале за 72,7%, на само 2.208 продадени возила во првите два месеца од 2025 година, во споредба со истиот период лани.

Што ја спречува "Lancia" да оствари успех?

Постојат неколку можни причини:

• Цената на новиот "Ypsilon" – значително е повисока од претходната генерација. Во Италија, хибридната верзија стартува од 23.900 евра, додека целосно електричната чини 29.900 евра. За споредба, стариот модел се продаваше под 20.000 евра.

• Внатрешна конкуренција – "Ypsilon" ја дели платформата со "Peugeot 208" и "Opel Corsa", модели кои имаат посилна препознатливост на пазарот.

• Прекин на производството на стариот модел – поволниот стар "Ypsilon" е повлечен, а новата верзија се натпреварува во повисок ценовен сегмент, каде што се соочува со посилна конкуренција.

Дали "Stellantis" ќе даде уште една шанса?

"Lancia" не планира да се откаже. До крајот на 2025 година, брендот ќе отвори 70 нови салони во 70 европски градови.

Главни пазари за проширување ќе бидат Франција, Шпанија, Белгија, Луксембург и Холандија, додека Германија е следна на ред.

Во наредните години, "Lancia" ќе претстави нови модели:

• "Lancia Gamma" – пристигнува во 2026 година

• "Lancia Delta" – враќање на легендарниот модел до крајот на деценијата

Неколку недели пред да ја напушти функцијата, поранешниот извршен директор на "Stellantis", Карлос Тавареш, изјави дека сите 14 брендови на групацијата финансиски се обезбедени до 2026 година.

Тоа значи дека концернот ќе ѝ даде на "Lancia" уште малку време да се стабилизира.

Сепак, со оглед на тоа што во првата половина од 2025 ќе биде именуван нов извршен директор, останува неизвесно каква иднина ја чека оваа некогашна автомобилска икона.

"Lancia" не е единствениот проблем за "Stellantis"

Не само што "Lancia" се соочува со проблеми, туку и "DS Automobiles", премиум подбрендот на "Citroën", бележи слаби резултати.

Според "ACEA", продажбата на "DS Automobiles" во јануари и февруари 2025 година паднала за 30,3%, со само 5.060 продадени автомобили во регионот на ЕУ + ЕФТА + Велика Британија.

Податоците на "Dataforce" го потврдуваат истиот тренд, што дополнително покажува дека "Stellantis" има сериозни предизвици со повеќе свои брендови.