Ако се суди според продажбата на првиот модел од поставата „Neue Klasse“, моделот „iX3“, пазарот одлично го прифати новиот дизајнерски израз на брендот. Наскоро се очекува и редизајн на серијата 7 според истиот принцип, а потоа и на серијата 3.

Новата генерација веќе е на хоризонтот, а според најновите рендери популарната баварска лимузина ќе добие целосно нов визуелен идентитет инспириран од концептот „BMW Vision Neue Klasse“. Станува збор за најголемата дизајнерска промена на „BMW“ во последните дваесетина години.

Рендерите што ги придружуваат овие информации даваат прв добар увид во тоа како би можела да изгледа новата „тројка“, модел кој со децении е столб на понудата на „BMW“.

Новиот стил го карактеризираат чисти линии, големи површини на каросеријата и минималистички пристап кон деталите, со задржување на препознатливиот идентитет на „BMW“. Кај идната серија 3 се очекува потенка и хоризонтално нагласена маска на ладилникот, целосно нов потпис на „LED“ светлата и значително поедноставен, но поелегантен преден дел. Иако традиционалните „бубрези“ ќе останат, тие ќе бидат интегрирани во помодерен и посуптилен дизајн.

Профилот на автомобилот треба да биде почист и поаеродинамичен од актуелната генерација, со пократок преден дел и порамна линија на покривот, што дополнително ќе го нагласи спортскиот карактер на лимузината.

Електрична и класична верзија

„BMW“ планира паралелно да понуди електрична и класична верзија, што досега се покажа како одличен избор.

Електричниот модел ќе биде изграден на целосно новата електрична платформа „Neue Klasse“. Се очекува да биде претставен веќе во 2026 година, а на пазарот би требало да пристигне кратко по тоа.

Класичната серија 3 со бензински и хибридни мотори исто така ќе добие освежен дизајн, визуелно усогласен со електричната верзија.

Нова технологија и дигитална кабина

„Neue Klasse“ не носи само нов изглед, туку и целосно нова технолошка платформа. Електричните модели ќе користат систем од 800 волти и нова генерација батерии со поголема густина на енергија, што би требало да овозможи до 30 проценти поголем досег.

Во внатрешноста се очекува целосно нов дигитален кокпит со голем централен екран и проекциски дисплеј што се протега речиси по целата ширина на ветробранското стакло.

„BMW“ развива и нов централен компјутерски систем наречен „Heart of Joy“, кој ќе управува со погонот, шасијата и дигиталните функции на возилото.

Голем јубилеј за серијата 3

Новата генерација на серијата 3 треба да биде претставена токму во време кога овој модел одбележува 50 години постоење, што дополнително ги зголемува очекувањата. Премиерата би можела да се одржи веќе оваа година, додека пристигнувањето на пазарот се очекува во 2027 година.