Здравата исхрана не мора да биде строга или црно-бела – всушност, експертите истакнуваат дека повременото уживање во омилената „нездрава“ храна е сосема во ред. Новото истражување на Универзитетот Дрексел дополнително ја потврдува оваа идеја.
Студијата не одредила која диета треба да се следи, туку истражила како намалувањето на високо преработената храна (UPF) може да го подобри здравјето.
Во осумнеделната програма учествувале 14 жени со прекумерна тежина кои добивале секојдневна едукација за исхраната и желбата за храна, планови за оброци, финансиска поддршка за поздрави опции и поддршка од семејството.
Резултатите покажале дека учесниците го намалиле внесот на високо преработена храна за речиси 50 отсто, што довело до просечно намалување од 600 калории дневно, 50 отсто помалку шеќер и 37 отсто помалку натриум. Тие исто така изгубиле во просек по четири килограми и пријавиле подобро ниво на енергија, подобро расположение, намален оток на рацете и нозете и помалку желба за преработена храна.
Прекумерното внесување на високо преработена храна е исто така поврзано со когнитивниот пад
„Високо преработената храна вклучува брза храна, пакувани грицки, замрзнати оброци, газирани пијалаци, бонбони и преработени житарки – производи кои често содржат адитиви, вештачки вкусови, бои, засладувачи и конзерванси“, објасни нутриционистката Кери Хокинс за „Parade“.
Едноставен начин за препознавање на високо преработената храна е да се избегнуваат производи со долга листа на состојки кои не би ги користеле во нашата домашна кујна. Ако не можеме да препознаеме или изговориме некоја состојка, голема е веројатноста дека храната е високо преработена.
Покрај влијанието врз тежината, прекумерното внесување на високо преработена храна е поврзано и со когнитивното опаѓање, дополнително нагласувајќи ја важноста од намалување на внесот. Сепак, истражувачите истакнале дека клучот за успехот била поддршката што ја добивале учесниците – планирањето на оброците, финансиската помош и едукацијата кои им го олесниле преминот кон поздрава исхрана.
Како заклучок, ова истражување покажало дека слабеењето и подобрувањето на здравјето не бараат строги диети или броење на калории. Едноставното намалување на внесот на високо преработена храна може да обезбеди долгорочни придобивки, што го прави одржлива алтернатива на плановите за рестриктивна исхрана.
