Овој пат не зборуваме за подеднакво славниот "Fiat 500", туку за неговиот поголем и постар брат – "Fiat 600", познат и како "Seicento". Овој мал, заоблен автомобил со должина од 330 cm можеше да превезува цели семејства.

Автомобил што го промени европскиот пејзаж

Во раните 1950-ти, Италија закрепнуваше од Втората светска војна, а побарувачката за мали, економични автомобили значително се зголеми. "Fiat" веќе имаше успешен модел – "Topolino", но пазарот бараше помодерен и попростран автомобил.

Токму затоа, легендарниот инженер на "Fiat", Данте Џакоза, доби задача да создаде мал автомобил, доволно простран за четири лица и лесен за одржување.

"Fiat 600" имаше задно поставен четирицилиндарски мотор со 23 коњски сили, што беше доволно за неговата лесна каросерија.

Еволуција на моделот

Само една година по претставувањето, "Fiat" лансираше верзија со роло-кров, а набргу по тоа пристигна револуционерниот модел – "Multipla", со три реда седишта во должина од само 350 cm.

"Fiat" постојано го унапредуваше овој модел. Во 1960 година, пристигна редизајнирана верзија со нови светла и поголем мотор од 767 cm3 со 29 КС. До 1965 година, автомобилот доби „нормални“ врати, а со зголемениот резервоар за гориво, беше полесно да се патува на подолги дестинации.

"Fiat 600" и неговите лиценцирани верзии ја моторизираа југоисточна Европа, а најуспешна варијанта беше "Zastava 750", попозната како "Фиќо". Овој иконски модел, со неколку модернизации, се произведуваше сè до 1985 година и достигна 900.000 продадени примероци.

"Fiat 600" се произведуваше и во Јужна Америка, Австрија и Германија, а вкупната бројка на произведени единици достигна 2.7 милиони. Кога се додаваат и сите изведени модели, бројката расте на околу 5 милиони.

"Fiat 600e" – електрична иднина со ретро име

Во 2023 година, "Fiat" го оживеа името „600“ со целосно електричен модел – "Fiat 600e", компактен кросовер кој го следи успехот на "Fiat 500e".

Технички спецификации:

• Мотор: Електричен, со 156 КС (115 kW)

• Батерија: Капацитет од 54 kWh, што овозможува домет до 400 km (WLTP циклус)

• Полнење: Поддржува брзо полнење до 100 kW, што овозможува 80% полнење за околу 27 минути

• Димензии: Должина од 4.17 m, значително поголема од оригиналниот Fiat 600

Иако "Fiat 600e" нема техничка поврзаност со оригиналниот "Fiat 600", неговото име носи доза на носталгија, поврзувајќи ја богатата историја на брендот со модерната електрична иднина.