Во среда вреди да се дојде во Арена Загреб заради Тимур Дибиров, кој со Загреб ќе го затвори своето последно европско поглавје. Тоа ќе биде третиот и последен клуб во неговата кариера – започна во Чеховски Медведи, го достигна врвот во Вардар, со кој двапати ја освои Лигата на шампионите, и сега ја завршува кариерата во Хрватска.
Загреб во среда од 18:45 часот ќе го одигра последниот натпревар во Лигата на шампионите оваа сезона, против Киелце. По големата победа во Сегед, сите очекуваа дека во полна Арена Загреб против Полјаците ќе се игра одлучувачки натпревар за пласман во следната фаза. Но, нерешениот резултат со Колстад, потоа повредите на Срна, Гојун и Валчак, како и поразот во Алборг, ставија крај на тие надежи.
Штета, бидејќи ова можеше да биде вистински спектакл, но ќе остане запаметен по тоа што ќе биде последниот европски натпревар на Тимур Дибиров (41). Тој најави дефинитивен крај на кариерата по оваа сезона и ќе замине како втор најдобар стрелец во историјата на Лигата на шампионите, зад единствениот Кире Лазаров.
Среќен сум што имав можност да тренирам ваков играч, вели тренерот на Загреб, Ивица Петковиќ.
„Тој е еден од најголемите играчи што се појавиле во Европа, легенда на Лигата на шампионите, втор стрелец на сите времиња. Жал ми е што ја завршува кариерата, и нему самиот му е жал. Вели дека сè му функционира тука, му одговара тимот, му одговара тренерот, атмосферата е одлична, но дојде времето. Секогаш доаѓа тоа време, и ова е крајот. Ова му е последниот натпревар во Лигата на шампионите, а ќе му дојде и семејството од Русија да го испрати. Верувам дека моите играчи ќе направат сè за да му приредиме достоен испраќај на теренот“, заклучи Петковиќ.
Искусниот крилен ракометар, кој во јули ќе наполни 42 години, во текот на својата богата кариера настапуваше за само три клуба: Чеховски Медведи, Вардар и Загреб. Најдлабока трага остави во Скопје, каде што беше дел од тимот што двапати ја освои Лигата на шампионите и стана вистинска легенда на македонскиот ракомет.
