Паркот е поделен на два дела – простор за разгледување каде се поставени копии на најпознатите споменици на денешницата во намалена форма и простор за шопинг, јадење и забава.

Веднаш на влезот ќе ве пречека готски замок и терасовидна градина со големи скалила, фонтани и скулптури инспирирани од европската ренесанса. Светскиот парк Пекинг опфаќа неколку градини со минијатурни модели на најпознатите статуи во светот – од Статуата на слободата до Давид на Микеланџело до Малата сирена од Копенхаген.

Наместо да посетите стотици земји ширум светот и да потрошите десетици илјади евра за патувања, хотели и превоз, во Светскиот парк Пекинг можете да ги видите сите светски чуда на едно место. Тој опфаќа околу сто копии на градби од целиот свет, особено од Азија, Африка, Европа, Северна и Јужна Америка и Австралија.

Копии од познати светски градби

Во овој парк можете да видите намалена верзија на Ајфеловата кула, египетските пирамиди, Сиднејската опера, па дури и реплика на оригиналните облакодери на Светскиот трговски центар во Њујорк кои беа уништени во терористичкиот напад на 11 септември 2001 година.

Инаку Светскиот парк Пекинг беше отворен во 1993 година, а годишно го посетуваат околу 1,5 милиони луѓе.

Во забавниот дел од паркот можете да купите сувенири од целиот свет, како и да вкусите различни јадења од светската кујна. Исто така посетителите им се нудат и разни манифестации кои ги објаснуваат обичаите на одредени земји и нивните култури.