Случајот со 31 дете пронајдено во една куќа во Брчко сè уште се истражува. Денеска во 13 часот, судот треба да одлучува за одредување притвор за сопственичката на куќата З. Ѓ., нејзиниот син А. Ѓ. и В. П. од Бања Лука, кои беа уапсени истиот ден кога децата беа пронајдени.
Сепак, истрагата се проширува и против уште пет лица кои се претставиле како родители или роднини на децата, но во овој момент нема докази дека навистина се нивни.
Како што соопшти в.д. главниот обвинител на Брчко, Радмило Ивановиќ, овие пет лица беа уапсени на 26 февруари, еден ден по пронаоѓањето на децата, и денеска ќе бидат изведени пред Обвинителството.
„Станува збор за лица кои се декларираат како родители или роднини на децата кои беа пронајдени, но Обвинителството нема сигурни податоци и докази дека тие навистина се нивни родители“, изјави Ивановиќ.
Тој додаде дека ова ќе биде предмет на понатамошна истрага.
„Можам да кажам дека полицијата на Дистриктот спроведува интензивна истрага по наредба и под надзор на Обвинителството“, изјави Ивановиќ.
Да потсетиме, полицијата претходно денеска соопшти дека во текот на денот против уште пет осомничени – Х.Х. (52), Ш.Л. (37), О.Ш. (25), Х.С. (37) и Х.Н. (41) – ќе биде поднесен извештај до Обвинителството на Брчко, поради основано сомнение дека сториле кривично дело „Запуштање или злоупотребување на дете“.
„Надлежниот обвинител ќе одлучи дали ќе предложи мерка притвор за овие лица пред Основниот суд на Брчко Дистрикт БиХ“, се наведува во соопштението.
