Цените на нафтата пораснаа на азиското тргување денеска, откако американскиот претседател Доналд Трамп ѝ ја одзеде лиценцата на „Шеврон“ за бизнис со Венецуела.
Според аналитичарите, ова може да доведе до намалување на глобалните резерви на нафта.
Според одлуката на администрацијата на Трамп, американската компанија „Шеврон“ повеќе нема да смее да произведува нафта во Венецуела ниту да ја извезува таму. Мерката стапува на сила од 1 март, објавија странските новински агенции.
„Шеврон“ во јануари извезуваше 294.000 барели нафта дневно во Венецуела, што е највисоко ниво од почетокот на 2023 година, кога претходната администрација на Џо Бајден ѝ дозволи да работи со земјата, пренесе „Ројтерс“.
Во меѓувреме, Венецуела во јануари произведуваше нешто повеќе од еден милион барели дневно, според податоците на нафтениот картел ОПЕК.
Цената на 159-литарски барел тексашка сурова нафта за испорака во април утрово, според средноевропско време, изнесуваше 68,75 долари, што е за 13 центи повеќе од средата.
Во Лондон, априлските фјучерси на северноморската сурова нафта „Брент“ пораснаа за 18 центи, достигнувајќи 72,71 долар за барел.
