Брендовите што се натпреваруваат во луксузниот сегмент постојано се обидуваат да ја надминат конкуренцијата со иновации кои ќе привлечат уште повеќе финансиски моќни купувачи. „Rolls-Royce“ отсекогаш бил на врвот на таа хиерархија, постојано поместувајќи ги границите на луксузот на ниво кое другите можат само да го сонуваат. Сепак, производителот од „Goodwood“ доцнеше кога станува збор за мирисите во автомобилите. Но, подобро некогаш отколку никогаш – „Rolls-Royce Scent“ конечно е тука, а својата премиера ја доживува во врвниот седан „Phantom“, кој сега добива специјално дизајниран систем за испуштање мирис. Инженерите го креираа така што мирисот нежно ја исполнува кабината, без да доминира, овозможувајќи долготраен и софистициран ефект.

„Кедровото дрво“ е избрано поради неговото смирувачко дејство, додека „розовото дрво“ внесува „сува, благо сладникава нота“. „Амирис“ додава „дрвенести, димни поттонови“, а „ирисот“ носи цветен акорд. Овие четири компоненти се внимателно комбинирани за да создадат мирис достоен за ентериерот на еден „Rolls-Royce“. Конечното формулирање на парфемот било постигнато по повеќе од 30 итерации, со тестирања во екстремни температурни и влажни услови. Не би било изненадување ако „Rolls-Royce Scent“ се прошири и на другите модели на брендот, како „Ghost“, „Cullinan“, „Spectre“ и новото електрично возило што пристигнува кон крајот на 2025 година. На крајот на краиштата, „BMW“ веќе со години го нуди „Ambient Air Package“ со мирисни патрони сместени во преградата за ракавици. Сепак, „Rolls-Royce“ тврди дека нивниот нов мирис е далеку порафиниран од оние што се користат во „BMW“ моделите.

Колку чини „Rolls-Royce“ парфемот?

Британскиот ултра-луксузен бренд не ја открива цената, но тоа и не е прашање што го интересира просечниот купувач – имајќи предвид дека минатата година просечната цена на нов „Rolls-Royce“ во „САД“ изнесуваше половина милион долари. Дури и основниот „Ghost“ чини околу 400.000 долари пред дополнителните опции, додека персонализиран „Phantom“ лесно достигнува седмоцифрени суми. А ако излеземе од стандардната понуда и погледнеме во светот на уникатните креации, цените стануваат астрономски – некои ќе се сетат на ексклузивниот „Boat Tail“, кој наводно бил продаден за неверојатни 28 милиони долари.