Рускиот претседател Владимир Путин му порачал на рускиот премиер Михаил Мишустин дека главна задача оваа година е да се тргне кон патот на стабилен економски раст и да се намали инфлацијата, пренесува Спутник.
Тој исто така кажал дека е неопходно да се промени структурата на економскиот раст, оценувајќи дека е важно да се создадат нови компании и да се отворат нови работни места во сите руски региони со примена на најсовремени технологии.
За да се постигне ова, истакна рускиот претседател, неопходно е да се применат мерки по моделот на оние што беа користени за чистење на последиците од пандемијата на коронавирус.
„Неопходно е да се обезбеди ефикасна поддршка во одредени насоки, како што беше случајот по пандемијата. Неопходно е да се усвојат сите потребни решенија за да се создадат перспективи за понатамошен раст“, истакна Путин.
Кога станува збор за досега постигнатите резултати, Путин рече дека тие се многу добри, како и дека темпото на економски раст е над планираното и над светското.
Осврнувајќи се на намалениот раст на БДП во европските земји, Путин рече дека тоа е исклучиво проблем на тие земји, иако „јасно е зошто се случи тоа“.
Рускиот премиер Михаил Мишустин објави дека растот на БДП во Русија изнесува 4,1 отсто, што е за 0,2 отсто повеќе од планираното. Само во декември растот на БДП беше 4,5 отсто.
Тој исто така рече дека номиналниот обем на БДП во 2024 година изнесува 200 трилиони рубљи, што е исто така „историски максимум“.
„Економијата успешно се справи со санкциите, за разлика од многу други земји кои беа предмет на рестриктивни мерки. Руската економија стана многу повеќе базирана на технологија и разновидна“, рече тој.
Тој додаде и дека приходите на руските граѓани се зголемиле за 8,4 отсто во текот на 2024 година, а невработеноста паднала на 2,3 отсто, пренесува медиумот.
