Франција испорачува борбени авиони на Украина: Зеленски му се заблагодари на Макрон за Мираж 2000, пристигна првата група ловци!

Украинскиот претседател Володимир Зеленски му се заблагодари на својот француски колега Емануел Макрон за првата испорачана серија борбени авиони Мираж 2000. Зеленски ова го објави на социјалната мрежа „Х“, пренесува Укринформ.

„Украинската воздухопловна флота продолжува да се развива. Првите авиони Мираж 2000 пристигнаа од Франција, дополнително зајакнувајќи ги нашите капацитети за противвоздушна одбрана. Му благодарам на Емануел Макрон за неговото лидерство и поддршка – францускиот претседател си стои на зборот, и ние тоа го цениме. Ова е уште еден чекор во зајакнувањето на безбедноста на Украина“, истакна Зеленски.

Според него, благодарение на најновите испораки, Украина продолжува да ја проширува својата флота Ф-16, а Холандија ги исполнува своите обврски во поддршка на овие напори.

Зеленски изрази благодарност до „сите кои помагаат и придонесуваат“ за оваа цел.

Како што претходно објави Укринформ, во Украина пристигнаа првите француски борбени авиони Мираж 2000, управувани од украински пилоти кои поминаа неколкумесечна обука во Франција.

Да потсетиме, во ноември данската премиерка Мете Фредериксен објави дека Украина добила шест ловци Ф-16 од Данска и дека ќе добие уште 13 авиони.

Испораката на авионите Ф-16 е дел од пошироката иницијатива позната како „Коалиција за авијација“, чија цел е зајакнување на воздушните борбени способности на Украина. Во август 2024 година, Украина ја доби првата серија од овие авиони од Данска и Холандија.