Нова алатка за вештачка интелигенција, наречена „Find-AF“, открива срцеви заболувања уште пред појавата на првите симптоми, со што спасува животи и го намалува ризикот од фатални мозочни удари. Алатката ги анализира медицинските досиеја на милиони луѓе за да идентификува рани индиции за атријална фибрилација – состојба која може да предизвика неправилно чукање на срцето и сериозни здравствени компликации.

Како функционира „Find-AF“?

Развиена од тим научници и лекари од „Универзитетот во Лидс“ и фондацијата „Leeds Teaching Hospitals“, алатката ги користи анонимизираните медицински податоци на повеќе од 2,1 милиони пациенти за да ги пронајде оние со висок ризик. По првичната анализа, алатката е тестирана и на податоци од дополнителни 10 милиони луѓе, при што покажала извонредна точност.

„Find-AF“ овозможува откривање на ризикот од развој на атријална фибрилација во следните шест месеци, по што пациентите добиваат дополнително тестирање и третман за намалување на ризикот од мозочен удар.

Животи спасени благодарение на оваа алатка

Џон Пенгели, пензиониран офицер, кој учествувал во тестирањето, сведочи за ефикасноста на алатката. „Навистина сум благодарен што ми беше откриена атријална фибрилација. Сега, само со неколку апчиња дневно, го намалувам ризикот од мозочен удар,“ изјави тој.

Атријалната фибрилација често е асимптоматска, што ја прави тешка за откривање, но со новата технологија, експертите веруваат дека илјадници животи ќе бидат спасени.

Британската фондација за срце: „Секое рано откритие е клучно“!

Според Британската фондација за срце „(BHF)“, околу 1,6 милиони луѓе во Обединетото Кралство имаат дијагностицирана атријална фибрилација, но илјадници други живеат со оваа состојба без да бидат свесни. „Кога состојбата е откриена навреме, ризиците можат значително да се намалат,“ нагласуваат од BHF.

Оваа револуционерна технологија не само што ја трансформира медицинската дијагностика, туку отвора нови можности за борба против срцевите заболувања на глобално ниво.