Европа и САД се беспомошни пред заканата од руското хиперсонично оружје, меѓу кои и новата ракета „Орешник“.

Се смета дека противракетниот систем THAAD е единствениот американски систем способен да одговори на руското хиперсонично оружје, вклучително и на новата балистичка ракета со среден дострел „Орешник“.

И покрај тоа, дури и Американците се сомневаат во способноста на THAAD да пресретне вакви ракети. Сепак, споредено со другите системи за ПВО, овој систем нуди малку поголеми шанси за успех.

Шансите се минимални

Според National Interest, хиперсоничниот арсенал на Русија е една од најголемите закани за САД и НАТО. Рускиот претседател Владимир Путин истакна дека ниту еден постоечки систем за ПВО не може да ги пресретне овие проектили поради нивната огромна брзина и сложени летачки траектории.

Иако изјавите на Путин можат да бидат точни, единствениот систем кој, во идеални услови, би можел да пресретне руска хиперсонична ракета е THAAD.

„Системот THAAD има многу мала веројатност за успех против руското хиперсонично оружје. Немаме големи очекувања, но тоа е нашата најдобра надеж“, наведува порталот.

Дури и ако THAAD успее против руските супероружја, САД и Европа не располагаат со доволен број вакви системи за да ги покријат заканите од Москва.

Во светот моментално има само девет батерии THAAD, од кои САД поседуваат седум. До 2025 година се очекува бројот да се зголеми на 15.

Ограничувања и цена на THAAD

Секоја батерија на системот THAAD чини над една милијарда долари. Батеријата се состои од ракети-пресретнувачи, лансери, радар, платформа за команда и контрола и 95 војници.

Заради ограничената количина и екстремно високата цена, Украина нема да добие THAAD. Пентагон не би ризикувал толку скап ресурс за употреба во Украина, особено кога неговата ефикасност против руските хиперсонични ракети не е загарантирана.

Клучниот предизвик за Вашингтон

Поставувањето на THAAD во близина на границите на Русија носи значителен ризик за САД, бидејќи руската војска би ги третирала овие системи како приоритетни цели и веројатно би ги уништила брзо.

Проблемот со кој се соочува Вашингтон е дали да го надгради постојниот THAAD за да се справи со хиперсоничните закани или да развие сосема нов систем. Сè додека ова прашање не добие одговор, руските хиперсонични ракети, вклучително и „Орешник“, остануваат речиси недопирливи.

Како функционира THAAD?

Радарот за рано предупредување го открива лансирањето на балистичките ракети и ги следи нивните траектории. Терминалниот радар со висока фреквенција (11–12 GHz) ја следи ракетата во нејзината финална фаза и ја насочува антибалистичката ракета кон целта.

THAAD е мобилен систем кој може да пресретнува балистички ракети во и надвор од атмосферата, на оддалеченост до 3.000 километри.