Метју Пери, комичар, продуцент и актер – најпознат по улогата на Чендлер Бинг во една од најпопуларните серии во светот, „Friends“, искеширал нешто помалку од 5 милиони долари за скапоцената модерна вила, изградена во стил на средновековните благородни зданија, на Холивуд Хилс.

Она поради кое убавата „бела куќа“ на покојниот и непрежалениот Чендлер овојпат повторно е во центарот на вниманието e нејзиното неодамнешно појавување на пазарот на недвижности. Цената што идните сопственици ќе треба да ја платат е 5,2 милиони долари.

Инаку, вилата е изградена во 1957 година и неодамна е реновирана. Се одликува со кратка, но широка патека која завршува во гаража со два автомобили, како и необични скали кои водат до влез во атриумски стил.

Целосно белата градба има три спални соби и четири бањи во нешто повеќе од 250 квадратни метри простор за живеење на едно ниво, кој може да се пофали со мешавина од камени и дрвени подови.

Бројните лизгачки стаклени врати водат до место за одмор во дворот со поглед на големиот базен.

Кино сала и маса за билјард

Инстаграм профилот @housesofcelebs нѝ даде увид во внатрешноста на просторот, а она што особено остава без здив е големата кино сала со исто толку голем екран за филмски проекции. Не помалку примамлива е и просторијата за рекреација, каде што почесното место го зазема масата за билијард.

Она што е многу необично, со оглед на несекојдневната надворешност, е распоредот на дневната соба во која доминира едноставноста во вид на софа и фотелји, кои можете да ги најдете во било кој стилски осмислен дом.