Трендовите неизбежно се менуваат, но во летната сезона можеби најмалку!

Секогаш можеме да сметаме на лелеавите макси фустани, цветните принтови, еспадрилите, платнените чанти, сламените шешири, тексас шорцевите, белите патики...

Еден од таквите безвременски летни трендови е дефинитивно стариот „трик“ на инфлуенсерките - ако сакате да изгледате шик и ефектно во исто време, едноставно откријте ги рамениците!

Токму тоа нѝ го овозможува класичниот бардо топ, кој е само гламурозен начин да се опише секоја маица, блуза или кошула која ги открива рамената.

Што е бардо топ?

Топовите со отворени рамена (off-shoulder или bardot top) веќе со децении се застапени во летниот стил, а за нивната популарност најмногу придонесе француската актерка Брижит Бардо во 1950-тите и 1960-тите години.

Таа често носеше вакви парчиња, а нејзината сензуалност и уникатен стил направија ова откривање на рамената да се поврзува со женственост и заводливост. Оттогаш, бардо топот остана симбол на елеганција и суптилна сексуалност.

Како да го комбинирате?

Меѓу најголемите предности на бардо топот е неговата разновидност и практичност.

Едноставно, се вклопуваат во секој стил! Ваквите топови се достапни во различни дизајни, бои и материјали, што ги прави практични парчиња за различни пригоди, а можете да ги најдете со долги или кратки ракави, со тантела, карнери, разни дезени, класични кроеви... Нема граници!

Секако, оние поквалитетните и со потпис на познатите брендови подразбираат повисока цена, но во продавниците на high street брендовите лесно ќе најдете пристапни опции за топови со отворени раменици и ќе се трансформирате во заводничка во стилот на Брижит Бардо.