Истражувачката куќа „Belingcat“ открила дека уапсените маж и жена поседуваат стан во истата московска зграда во која се сместени уште неколку високорангирани вработени во „ГРУ“, руска воена разузнавачка служба.

Останатите познати жители на зградата ги вклучуваат наводните соучесници во труењата со новичок и надзорникот на кампањата за летот 17 на „Malaysia Airlines“, пишува „Медуза“, пренесува „Јутарњи лист“.

Како што е порано објавено, двајцата руски доселеници и наводни шпиони се уапсени во Стокхолм на 22-ри ноември.

Истражувачите од „Expressen“ и „Dossier Centar“ ги идентификувале осомничените како Сергеј Сквортсов (59) и Елена Кулкова (58).

Во Шведска живеат од 1997-ма година, а покрај руското имаат и шведско државјанство.

Според обвиненијата поднесени во Окружниот суд во Стокхолм, осомничените активно шпионирале од 2013-та година.

Истражувачкиот новинар Христо Грозев открил дека парот и нивната ќерка се запишани како сопственици на стан во Москва на улица Зорге 36. Сепак, не е јасно дали парот некогаш живеел таму.

„Belingcat“ исто така јавува дека во соседниот стан до шпионскиот пар живее и генерал-мајорот на ГРУ Денис Сергејев, наводен соучесник во труењето на Скрипаљ. Сергејев исто така наводно бил вмешан во труењето со Новичок на бугарскиот бизнисмен Емилиан Гебрев во 2015-та година.

Во истата зграда живее и генерал-мајор Андреј Аверјанов, шеф на единицата 29155 на ГРУ, позната по вршење на убиства во странство. Меѓу другото, Аверјанов бил и командант на операцијата која предизвикала експлозија во складиштата за муниција во Врбетице во Чешка во 2014-та година. Во таа операција учествувале и други вработени во ГРУ, познати под имињата Александар Петров и Руслан Боширов.

Освен нив, во зградата се наоѓа и генерал-мајор Андреј Илјченко, кој според „Belingcat“ е одговорен за повеќекратни кампањи за дезинформирање на ГРУ.

На пример, според изворите на „Belingcat“ од руската публикација „The Insider“, Илјченко ја надгледувал соработката меѓу поранешната новинарка на РТ Јана Јерлашова и холандскиот државјанин Макс ван дер Верф, кои ширеле лажни вести за летот 17 на „Malaysia Airlines“.

Откако „The Insider“ го објавил тој извештај, полицијата го пребарала станот на главниот уредник Роман Доброхотов во рамките на случајот кој го товарел Ван дер Верф за клевета. Доброхотов кратко после тоа побегнал од Русија.

Според шведските власти, Сергеј Сквортсов и Елена Кулкова поседувале разни претпријатија во земјата, вклучувајќи и такви за давање на „IT“ услуги, како и компанија за доставување на бродска и авионска опрема.

„Belingcat“ тврди дека една од компанијата де факто ја контролирал пензиониран полковник на „ГРУ“ преку други компании со седиште на Кипар.

Парот исто така бил во контакт и со шведските разузнавачи.

Се утврдило дека ќерката на парот го делела станот со синот на поранешен висок службеник на „MUST“, шведска Воена разузнавачка и безбедносна служба.

Предупредување

Откако осомничениот руски шпион Сергеј Сквортсов и неговата сопруга Елена Кулкова биле уапсени во Шведска, поранешен агент на MI6 предупредил дека Русија има раширена мрежа на агенти во Обединетото Кралство кои би можеле и да убијат по наредба.

Поранешниот шпион Џулијан Ричардс рекол дека Москва станала толку ефективна во шпионирањето во Британија, што разузнавачките агенции не знаат колку оперативци се активни во Велика Британија.