Диего Марадона е еден од најголемите фудбалери во историјата, а како таков му се посветени многу споменици.
Последниот е поставен во Валенсија, претставен во пресрет на финалето на „COTIF“, турнир за играчи до 20 години, во кој младата аргентинска репрезентација со 2:0 ја победи екипата на академијата на Валенсија.
Автор на скулптурата е шпанскиот уметник Рафаел Фери, а ја откри претседателот на Аргентинскиот фудбалски сојуз, Клаудио Тапија. Со оглед на дискутабилната сличност на вистинскиот Марадона и оној претставен на скулптурата, на социјалните мрежи се шират забавни коментари.
Имено, луѓето наведуваат дека скулптурата повеќе потсетува на Силвестер Сталоне или Брус Ли, па дури и на неуспешната реставрација на портретот на Исус Христос на шпанскиот уметник од 2012 година.