Кога заминуваат на одмор, се што сакаат некои луѓе е добро да се одморат, а на нив освен плажа, море и топло време, друго и не им е потребно.
Но, доколку сте едни од оние кои постојано се во потрага по авантура и акција, имаме неколку предлози за вас.
Имено, порталот "Matadornetwork.com" издвоил неколку хотели за кои се верува дека се "опседнати од духови", а во кои всушност можете да преноќите - доколку се осмелите.
Прв помеѓу нив е хотелот "Ruthin Castle" во Велс кој изобилува со чудни работи. Во хотелот се наоѓа јама во која некогаш се фрлале луѓе, а во овој дворец се случиле многу историски убиства. Легендата вели дека во текот на ноќта, низ ходниците се шета духот на Леди Греј која во свое време била осудена на смрт откако ја убила љубовницата на својот сопруг. Престојот во овој дворец може да ви биде пријатен, секако доколку немате страв од натприродното.
Ако сакате предизвици и сте вљубени во мистеријата, тогаш вистинското место за вас е хотелот "The Queen Mary". Наводно, во овој хотел можете да сретнете дух на девојка облечена во бело која ноќе шета низ него.
Хотелот се наоѓа во Калифорнија, а многумина зборуваат и дека тој е опседнат со духовите на луѓето кои биле некогашни гости во хотелот, но кои се удавиле во базенот.
"Ballyseede Castle Hotel" е дворец во Ирска во кој наводно можете да го сретнете духот на Хилда, последниот член од фамилијата Бленерхасет која го изградила дворецот во 18-тиот век. Легендата вели дека духот на Хилда отседнува во нејзината соба и зад себе остава мирис на рози.
Во хотелот "Farnswoth" во Пенсилванија наводно можете да сретнете духови на неколку војници кои настрадале во Граѓанската војна. Некои посетители на овој хотел наведуваат дека тие ги виделе војниците како шетаат во нивните соби, но и дека ги слушале нивните чекори и музика.
Дворецот "Tongariro", денес раскошен и убав хотел, некогаш бил дом во кој живееле жени кои барале азил во Нов Зеланд. Персоналот на хотелот вели дека медицинската сестра Шарлот починала во домот заедно со уште неколку жени кои барале азил, а нивните духови останале да живеат во овој дворец.
