Дуа Липа денес е една од најуспешните музичарки во светот. Со својот настап на Коачела ќе стане првата британска музичарка која ќе биде главна ѕвезда на овој фестивал. Својот статус на светската музичка сцена го потврди и пред две години со настапот на Гластонбери. Таа го врати диско-попот на врвот на музичките топ-листи, самата е авторка на бројни хитови, а славата ја користи и за промоција на Косово.

Преку фестивалот „Sunny Hill“ го промовираат Косово

Нејзиниот татко Дукаѓин во Приштина го основал фестивалот „Sunny Hill“, на кој настапувале Мајли Сајрус, Пеги Гу и Кети Пери, со што го поставил Косово на меѓународната сцена. Токму за претворањето на мал фестивал во релевантен меѓународен настан зборуваше на конференција во Загреб, по што даде интервју.

На прашањето дали еден музички фестивал може да направи повеќе за Косово отколку политиката, тој одговори потврдно.

„Мислам дека музичарите и спортистите, не само кога станува збор за Косово, туку и за која било друга земја, можат да направат многу повеќе од кој било политичар. Тоа е мое лично мислење“, рече тој.

Тој смета дека промоцијата на земјата е заедничка одговорност и дека Дуа Липа ја промовира својата земја најдобро што може, исто како што и тој го прави тоа преку фестивалот.

„Горди сме на она што го правиме за Косово. Тоа го правиме по сопствена волја, а не затоа што имаме некаков договор со владата. Немаме никаква поддршка од владата ниту нешто слично. Го правиме тоа затоа што сметаме дека Косово заслужува да биде претставено онака како што ние го гледаме“, објасни тој.

Тој се присетил дека во поранешна Југославија постоеле многу недоразбирања.

„Луѓето не се познаваа меѓусебно и многумина мислеа дека Албанците на Косово се сосема поинаков народ. Денес имаме можност да ја промовираме нашата земја, да го покажеме нејзиното гостопримство и убавините“, додаде тој.

„Дуа и јас одлично се разбираме“

Дукаѓин Липа ја раскажа и својата лична приказна. Поради политичките околности, во 1992 година ја напуштил Приштина и заминал во Лондон. Истата година, заедно со својата сегашна сопруга, бил заробен во воено Сараево.

„За среќа, денес можеме да се вратиме и да ја промовираме нашата земја онака како што заслужува“, рече тој.

Говорејќи за својата улога како татко и менаџер, тој вели дека со ќерка си одлично се разбираат.

„Дуа и јас сме во единствена позиција, како во деловниот, така и во приватниот однос. Многу сме блиски, одлично се разбираме и соработуваме уште од нејзиното детство. Затоа многу добро знаеме каде се границите меѓу деловниот и приватниот живот“, објасни тој.

Тој истакна дека ниту една одлука не се донесува без нејзино знаење.

„Таа е запознаена со сè што се однесува на нејзината работа, бизнисот и кариерата. Важните одлуки, оние навистина суштинските, секако, ги донесуваме заедно“.

На прашањето кој го има последниот збор, кратко одговори: „Секогаш таа“.

Тој додаде дека не се меша во креативните прашања и дека во тој поглед Дуа секогаш го има последниот збор.

Проговори на хрватски

Тој откри и дека семејството се труди Дуа Липа, и покрај славата, да живее што е можно понормално.

„Ако ја следите на социјалните мрежи, можете да видите каква е навистина. Не го прави тоа заради Инстаграм. Поминува многу време со пријателите од детството, кои и денес ѝ се најдобри пријатели. Посветува многу време на семејството, братот и сестрата, оди во ресторани и ужива во животот на вообичаен начин“, рече тој.

Тој потврди дека дома ги мешаат јазиците, но дека сите три деца течно зборуваат албански. На прашањето дали зборува хрватски, одговори на хрватски:

„Зборувам и хрватски, но со босански акцент...“.

На крајот, тој одби подетално да ја коментира политичката ситуација во Србија, каде што студентите со протестите влијаеле врз политичките одлуки.

„Не би сакал да навлегувам во политиката на други земји. Секогаш ми е драго да видам дека младите преземаат одговорност. Светот се развива, а мора да се развива и човечката природа. Како што отсекогаш сме велеле, иднината е во рацете на младите“, заклучи Дукаѓин Липа.