Во описот на видеото компанијата ја објаснила ситуацијата. „Една инфлуенсерка побара 2000 евра за да се сними како јаде наш кроасан и пие кафе... па еве го нашиот глобален финансиски директор кој го прави тоа бесплатно“, стои во објавата.

Објавата од саботата предизвикала бројни позитивни реакции. Многумина во коментарите навеле дека им е „доста од инфлуенсерите“ и го пофалиле директорот за „одличната работа“. Слична објава направиле и со профитероли.

Снимката со директорот стана хит

Видеото со финансискиот директор и профитероли на Инстаграм собрало повеќе од 4,5 милиони прегледи, додека верзијата со кроасан на ТикТок е прегледана речиси 150 илјади пати. Корисниците се пошегувале дека Гисбрехтс е подеднакво вешт во маркетингот на содржини како и во финансиите. Тој му се приклучил на синџирот „Le Pain Quotidien“, чие име на француски значи „секојдневен леб“, во 2023 година. Претходно работел во белгискиот синџир ресторани „Lunch Garden“ и во телекомуникациската компанија „Telenet“.

„Одлична промена на кариерата“, напишал еден корисник, додека друг додал: „Секој добар финансиски директор веднаш би искористил таква заштеда“. Манекенката и филантропка Норин Гудвин детално го објаснила својот став. „Во тоа е поентата. Да го снимаше ова инфлуенсер, намерно не би пиела кафе таму од принцип. Бидејќи бевте оригинални и духовити и не им ги давате моите пари на инфлуенсери, ќе дојдам кај вас на кафе и ќе си го платам.

Така функционира тоа. Инфлуенсерскиот маркетинг повеќе не функционира, туку постигнува спротивен ефект“, напишала таа. Некои го споредиле видеото со снимката од директорот на „McDonald's“, Крис Кемпчински, кој претходно годинава несмасно јадел бургер, и заклучиле дека Гисбрехтс завршил подобра работа.

Затворање на објекти во Велика Британија

Успешниот маркетиншки потег доаѓа по тешкиот период за компанијата. „Le Pain Quotidien“ во 2023 година морал да затвори девет свои локали во Велика Британија, откако тамошниот огранок завршил во стечај. Биле затворени осум ресторани во Лондон и еден во Оксфорд.

Единствената преостаната локација е онаа на лондонската железничка станица „St Pancras“, со која управува сестринска компанија. Тогашната извршна директорка Аник Ван Оверстраетен потврдила дека рестораните биле затворени на 30 јуни 2023 година и дека целиот персонал бил отпуштен, што значело губење на околу 250 работни места. Таа објаснила дека ги исцрпиле „сите можни опции“ за спас на бизнисот.