Снимката од добро познатата книга „1000 зошто 1000 затоа“ привлече внимание кај корисниците на интернет и многумина ги врати неколку децении наназад, во времето кога книгите се чуваа со години, а одредени наслови беа неизбежен дел од детството.
Оваа популарна книга со прашања и одговори од различни области беше особено омилена меѓу децата во Југославија во текот на 1980-тите.
Повеќе од обична книга
На едноставен и интересен начин, книгата „1000 зошто 1000 затоа“ ги објаснуваше појавите од светот што ги опкружуваше – од природата и науката до секојдневниот живот.
Изданието што го одбележа детството на бројни генерации во Југославија го објави „Вук Караџиќ“ од Белград. Изданието од 1987 година имаше 483 страници, илустрации, тврди корици и формат од 28×20 центиметри.
За многу малечки таа беше повеќе од обична книга – претставуваше своевиден прозорец кон светот и извор на одговори на безброј детски прашања.
Денес, кога се потребни само неколку секунди за речиси секоја информација да се најде на интернет, глетката на добро познатите страници разбуди силна носталгија.
Сеќавања на детството
Многумина се присетија на примероците што ги добивале од родителите и бабите и дедовците, но и на оние што со години сакале да ја имаат, а не можеле да си ја дозволат.
„Тато ми ја подари својата кога бев дете“, напиша една корисничка.
„Иако бев одлична ученичка, не ми ја купија. За тоа не се даваа пари, бидејќи се внимаваше на секој денар, а толку многу сакав да ја имам. Сите ја имаа, јас немав“, додаде друга.
„Ја обожавав таа книга. Сè уште ја имам“, открила трета.
„Мислам дека ја прочитав 1000 пати до четврто одделение. Ех, колку прашања се родија во детската глава и токму тука најдоа одговори“, заклучила четврта.
