Францускиот „Alpine“ ја подготвува новата генерација на моделот „A110“, а неговиот дизајн за првпат е прикажан преку скулптура во природна големина.

Изложениот експонат ќе биде една од главните атракции на штандот на „Alpine“ на Саемот за автомобили во Париз овој октомври.

Иако автомобилот е прекриен со своевидна сина „кожа“, контурите јасно ја откриваат еволуцијата на препознатливиот изглед на „A110“.

Остануваат предниот дел во форма на буквата V и карактеристичните двојни светла, додека новата генерација ќе биде нешто подолга, пониска и уште поаеродинамична.

Од „Alpine“ наведуваат дека дизајнот е инспириран од леснотијата и аеродинамиката, а еден од изворите на инспирација бил и „Concorde“.

Електричниот погон носи голема промена

Најголемата новина, сепак, се крие под каросеријата.

Новиот „A110“ ќе биде електричен спортски автомобил со два електромотори на задната оска, активно распределување на вртежниот момент и систем за контрола на пролизгувањето.

„Alpine“ веќе ја тестираше новата технологија во продолжена верзија на актуелниот „A110“, наречена „A110 Future“. Целта е електричната верзија да ја задржи агилноста по која е познат моделот, но со уште подобри можности за контрола на автомобилот.

Наместо една голема батерија поставена во подот, новиот „A110“ ќе користи две помали батерии, сместени на спротивните краеви на шасијата.

Ваквото решение овозможува понизок под и пониска положба на седење, а би требало да придонесе и за распределба на масата во сооднос 40:60 во корист на задната оска.

Електричниот систем ќе работи на 800 волти, што би требало да овозможи брзо полнење. „Alpine“ засега не ги открива капацитетот на батеријата, досегот ниту моќноста.

Позната е само проценката дека автомобилот ќе биде околу 300 килограми потежок од актуелната генерација поради електричниот погон.

Бензинскиот мотор сè уште не е исклучен

Иако „A110“ првично беше замислен исклучиво како електричен автомобил, „Alpine“ ја остава отворена можноста за вградување мотор со внатрешно согорување.

Директорот на компанијата, Филип Криф, потврди дека платформата е проектирана така што може да прифати бензински мотор.

Одлуката за производство на таква верзија би требало да биде донесена до крајот на 2026 година, а евентуалниот бензински модел би можел да пристигне околу две години подоцна.

Една од можностите е некој од хибридните погонски системи на компанијата „Horse Powertrain“, која ја основаа „Renault“ и „Geely“.

Еден од нивните мотори развива 354 КС и 515 Nm.