Френки Муниз, ѕвездата од серијата „Малколм во средината“, ги растажил своите обожаватели со новата објава на Инстаграм.
Покрај својата фотографија, тој споделил дека минува низ многу тежок период во животот и дека го допрел дното. Професионалниот возач на автомобилски трки додадал дека се обидува да работи на себе и од сето ова да излезе посилен.
„Последните шест недели од мојот живот беа кошмар од кој се молам да се разбудам. Сè изгледаше тешко, нејасно и како истовремено да се распаѓа. Не би му го посакал овој период никому. Неочекуваниот подарок среде сето тоа е што немав каде да се скријам. Имав време да се фокусирам на себе, искрено да се преиспитам и конечно да ги согледам областите од мојот живот на кои треба да работам ако сакам да станам подобра верзија од себе. Не онаа дотерана верзија што му ја покажувам на светот… туку вистинската“, започнал Муниз.
Тој признал дека „го допрел дното“, но дека можеби токму тоа чувство конечно ќе го натера да направи промени.
„Прочитав дека понекогаш токму допирањето на самото дно е она што те освестува. Те принудува да ги направиш промените што отсекогаш требало да ги направиш за да го живееш најдобриот можен живот. Таа мисла ми се врежа во сеќавањето. Верувам дека за пет години ќе погледнам наназад кон оваа најниска точка и ќе бидам благодарен за неа, бидејќи врвот на кој тогаш ќе стојам ќе постои само затоа што сум поминал низ сето ова“, напишал славниот актер, кој во последните години главно се фокусира на автомобилските трки.
Френки додал дека тешкиот период не е крајот на неговата приказна, туку делот во кој почнува да работи на себе, иако, како што рекол, тоа ќе биде непријатно и далеку од гламурозно, но неопходно.
Својата објава ја завршил со порака до сите оние кои минуваат низ тежок и предизвикувачки период.
„Ако и вие во моментов се наоѓате во некој мрачен или тежок период, не сте скршени. Повторно се изградувате. Да продолжиме понатаму!“, порачал тој.
Актерот не открил што се крие зад неговата моментална состојба, но објавата ја споделил два месеци откако открил дека се разведува од сопругата Пејџ Прајс. Парот бил во брак од 2020 година и заедно го имаат синот Мауз.
Муниз најпрво објавил видео со сопругата и нивниот син, на кое заедно танцувале на песната „Check Yes, Juliet“ од групата „We the Kings“. Набрзо ја избришал објавата, откако многумина го нападнале дека било „злобно на таков начин да го објави разводот“. Актерот и неговата поранешна сопруга потоа споделиле друга објава.
„По периодот на разделеност што го чувавме во тајност, Пејџ и јас одлучивме да продолжиме понатаму и да ставиме крај на нашиот брак. По 10 прекрасни години заедно, созревавме на начини кои ни помогнаа да сфатиме дека нашата врска најприродно и најдобро функционира како длабоко пријателство и како родители кои заеднички се грижат за своето дете. Имаме неверојатен син кој останува центарот на нашиот свет, а и двајцата сме посреќни и посилни како родители благодарение на љубовта и заедничкото созревање што ги споделивме“, напишале тие.
Муниз ѝ се заблагодарил на својата сопруга за сè што направила за нивното семејство.
„Таа ги стави своите соништа на чекање за јас да можам да ги следам моите и секогаш ми беше најголема поддршка. Тој темел на почит и пријателство нема да исчезне“, истакнал актерот, додавајќи дека ќе продолжат заедно да го развиваат „Muniz Racing“.
Пејџ во коментарите под објавата го бранела Муниз од претходните критики.
„Френки, многу ми е жал што почувствува потреба да го избришеш старото забавно видео од нашето семејство затоа што луѓето се толку сурови кон тебе. Овој свет е толку забеган… разводот е лош, секако – не дека сме возбудени поради тоа… но ние сме двајца возрасни луѓе кои знаат како да бидат во ист тим. Не можам да поверувам дека луѓето мислат дека знаат подобро“, напишала таа.
Поранешниот пар се запознал во 2016 година на 28. издание на „Frank Sinatra Celebrity Invitational“. Се свршиле во 2018 година, а две години подоцна стапиле во брак. Синот го добиле во 2021 година.
