Барселона и во претходните години знаеше да пријави вкупни приходи повисоки од една милијарда евра, но во тие бројки тогаш беа вклучени и вонредни финансиски потези, односно таканаречените финансиски „лостови“, со кои клубот се обидуваше да го стабилизира своето работење.

Овојпат ситуацијата е значително поинаква. Границата од една милијарда евра е надмината без такви потези, што во Барселона го сметаат за особено важен показател за закрепнувањето на клупските финансии.

Конечниот износ на приходите сè уште не е официјално објавен, но од клубот потврдија дека бил нешто понизок од планираните 1,075 милијарди евра.

Голем раст и покрај проблемите

Резултатот добива дополнително значење поради фактот што Барселона во текот на дел од сезоната не можеше да смета на целосниот капацитет на „Spotify Camp Nou“.

Дел од домашните натпревари беа одиграни на стадионите „Johan Cruyff“ и „Olímpic“, а ниту по враќањето на „Camp Nou“ клубот во почетокот го немаше на располагање целиот стадион. Капацитетот беше ограничен на приближно 42.000 гледачи.

Пред почетокот на сезоната во Барселона сметаа на повеќе од 60.000 достапни места, поради што во клубот веруваат дека остварениот финансиски резултат покажува колку простор има за дополнителен раст откако реновираниот „Camp Nou“ целосно ќе биде отворен.

На растот на приходите не влијаеле само приходите од натпреварите. Барселона во текот на сезоната склучила нови спонзорски договори, а рекордни резултати забележала и продажбата на клупски производи преку „Barça Licensing & Merchandising“.

Токму целосното отворање на „Camp Nou“, заедно со продолжувањето на комерцијалниот раст, би можело во следните сезони да ѝ донесе на Барселона уште поголеми приходи.