Миле Лефков од ВМРО-ДПМНЕ ја критикува паниката што ја шири СДС и министерката Филипче околу изградбата на национален центар за податоци, истакнувајќи ја важноста од безбедноста на личните и државни податоци за стабилноста на државата.
Неколку дена сведочиме на паниката што СДС и Венко Филипче ја шират дури и за оваа идеја за изградба на дата центи или центри за податоци, истакна денеска Миле Лефков, член на ИК и пратеник на ВМРО-ДПМНЕ.
„Прво, Филипче и неговото актуелно раководство во СДС треба да направат разлика помеѓу приватни дата центри и државен национален дата центар. Второ, Филипче е последен кој може да се грижи за интересите на граѓаните и нивниот квалитет на живот.
Државата има обврска од Реформската агенда или патот до ЕУ за изградба на национален дата центар. И како што информиравме Македонија има дата центар во Прилеп кој е секундарен, она што и треба е примарен каде што на едно место ќе се чуваат сите податоци од државните институции. Значи цел на овој дата центар е безбедност на личните податоци на граѓаните како и безбедност на податоците од државните институции“.
Лефков прашува дали Филипче и СДС кои шират паника се против безбедност на лични и државни податоци.
„Дали СДС знае дека тоа е клучно за безбедност и стабилност на државата? Дали СДС знае дека безбедни лични информации на граѓаните е од голема важност за остварување на нивните права по различни основици како здравствени, социјални и слично“.
Сајбер безбедноста или заштита од напади на системот на податоци е одлика, додава Лефков, на секоја современа држава. И според него, вообичаено додека ВМРО-ДПМНЕ се грижи за секој еден граѓанин и за државата, СДС бара начини за остварување на интереси на поединци.
