Научниците објавија откритие на нов астрофизички објект во раниот Универзум – хибрид составен од џиновска ѕвезда и голема црна дупка во нејзиниот центар.
Наречен „ѕвезда-црна дупка“ од авторите на студијата објавена во списанието „Nature“, предводена од Рохан Наиду од Технолошкиот институт во Масачусетс („MIT“), со учество на Италијанецот Сирио Бели од Универзитетот во Болоња, овој нов небесен објект би можел да ја објасни природата на многу мистериозни црвени точки што вселенскиот телескоп Џејмс Веб ги забележа на самите рабови на Универзумот, наведува „ANSA“.
Универзумот е полн со објекти кои понекогаш се огромни, насилни и исклучително моќни, а кои претставуваат вистински мистерии чија природа и потекло сè уште не успеваме целосно да ги разбереме, наведува агенцијата.
Пред извесно време ним им се придружија и некои необични црвени точки кои повеќепати ги забележа вселенскиот телескоп Веб, најмоќниот досега направен, додека го набљудува најдлабокиот дел од вселената, кој потекнува од периодот непосредно по Големата експлозија.
Токму на една од тие снимки сега се појавила нова црвена точка, овојпат поголема и посветла од останатите, што им овозможило на научниците подетално да проучат дел од нејзините карактеристики.
Така било откриено дека овој необичен објект наликува на огромна ѕвезда, со маса околу 100.000 пати поголема од масата на Сонцето, но истовремено емитува необично големо количество енергија, многу слично на она што го создаваат црните дупки.
Станува збор за необична појава која, според студијата, би можела да се објасни со постоењето на огромни ѕвезди во раните фази од развојот на Универзумот, какви што денес повеќе не постојат и кои биле составени исклучиво од водород.
Веројатно од слична природа се и бројните црвени точки кои телескопот Веб досега ги забележал.
Ако ова се покаже како точно, би станувало збор за огромно откритие во областа на астрофизиката, кое би можело да го објасни потеклото на многу други големи објекти, како одредени квазари или супермасивни црни дупки, за кои и натаму постојат бројни неодговорени прашања, пренесува „Tanjug“.
