Историската катедрала во Фуншал од 15 век викендов стана место на вистинска збрка, откако на социјалните мрежи се проширија тврдења дека Кристијано Роналдо и Георгина Родригез токму таму ќе се венчаат. Навивачи во дресови со бројот седум и туристи со маски од славниот фудбалер со часови чекаа на сонце, блокирајќи им го влезот на гостите кои навистина биле поканети на церемонијата.

Но, на крајот се покажа дека информацијата била лажна.

На целата ситуација веднаш реагираше и сестрата на Роналдо, Елма Авеиро, преку „Instagram“. Таа сподели фотографија од толпата собрана пред катедралата и кратко порача: „Надреално“, додавајќи емотикон од мајмунче што ги покрива очите.

Кристијано (41) и самиот реагираше на една снимка од хаосот, оставајќи пет емотикони што се смеат во коментар под објавата на „Instagram“.

Ова не е првпат токму сестрите или братот на еден од најпознатите фудбалери во светот со своите објави да привлечат внимание. Кристијано никогаш не криел колку му е важно семејството, а низ годините им помагал на најблиските и приватно и деловно. Сепак, неговите сестри Катија и Елма и братот Уго Авеиро повеќепати завршувале на насловните страници поради своите изјави и постапки, особено кога одлучувале јавно да го бранат славниот брат.

Со сите нив е многу близок, а неговиот успех низ годините му отвори на семејството и бројни деловни можности.

Многу блиско семејство

Помладата сестра Катија, на пример, се занимавала со музика. Кариерата ја започнала под уметничкото име „La Ronalda“, а се обидела и пред телевизиските камери со учество во реално шоу. Покрај тоа, таа и нејзината сестра Елма се занимавале и со моден бизнис кој Кристијано го поддржал.

Но, Катија привлече многу поголемо внимание со своите објави за време на пандемијата на коронавирусот отколку со кариерата. Кога Кристијано во 2020 година беше позитивен на коронавирус, неговата сестра јавно ги доведуваше во прашање пандемијата, тестирањата и епидемиолошките мерки и сето тоа го нарече голема измама.

Приказната доби неочекувано продолжение неколку месеци подоцна. И самата Катија се зарази, а поради воспаление на белите дробови заврши во болница. Тогаш им откри на своите следбеници дека се лекува и му се заблагодари на медицинскиот персонал кој се грижел за неа.

Ниту другата сестра на Роналдо, Елма Авеиро, не останувала настрана кога требало јавно да застане зад Кристијано. Особено се памети нејзината објава по натпреварот меѓу Јувентус и Барселона во 2020 година.

По победата на Роналдо над тимот на неговиот долгогодишен ривал Лионел Меси, Елма на социјалните мрежи сподели фотомонтажа на која Аргентинецот клечи пред Кристијано. Притоа го прогласи својот брат за крал и најдобар фудбалер на сите времиња, а објавата очекувано предизвика бројни реакции.

Својот став за фудбалот јавно го покажал и братот на Роналдо, Уго Авеиро. Неговата животна приказна има значително потешка позадина. Имено, Уго со години се борел со зависност од дрога, а Кристијано му помогнал во закрепнувањето. Подоцна презел деловни активности поврзани со името на неговиот брат, меѓу кои е и музејот посветен на кариерата на Роналдо.

Уго се најде во центарот на вниманието и поради Лука Модриќ. Кога хрватскиот капитен во 2018 година ја освои Златната топка и со тоа ја прекина десетгодишната низа во која наградата ја освојуваа исклучиво Роналдо и Меси, братот на Роналдо не го прифати добро исходот од изборот.

Тогаш фудбалот го нарече „расипан“, а одлуката Златната топка да му припадне на Модриќ – „срамна“.

Посебно место во животот на Кристијано Роналдо отсекогаш имала неговата мајка Марија Долорес Авеиро, со која е исклучително близок. Тој повеќепати зборувал за нејзините жртви и тешките години во кои одгледувала четири деца во скромни услови на Мадеира. Денес таа често го придружува својот син на важни натпревари и настани, а на социјалните мрежи не крие колку е горда на него.

Исто така, иако со години ги следат гласини за затегнат однос, Марија Долорес јавно тврдеше дека многу ја сака Георгина и дека најважно е нејзиниот син да биде среќен.

Таткото на Роналдо, Жозе Динис Авеиро, работел како градинар, а одреден период бил и економ во локалниот фудбалски клуб Андориња, во кој Кристијано ги направил своите први фудбалски чекори. Тој се борел со зависност од алкохол, а починал во 2005 година на 52-годишна возраст, кога Роналдо имал само 20 години. Фудбалерот подоцна во интервјуа зборувал за нивниот комплициран однос и за жалењето што неговиот татко не ги доживеал најголемите успеси во неговата кариера.