Крилниот напаѓач на Челси, Михајло Мудрик (25), може веднаш да им се врати на натпреварите, откако Светската антидопинг агенција (WADA) и Фудбалската асоцијација на Англија (FA) постигнаа договор околу неговиот случај за прекршување на антидопинг правилата. Со тоа дисциплинската постапка е завршена, а информацијата во петокот ја потврдија ФА и Челси.
Фудбалската асоцијација на Англија објасни дека одлуката е поврзана со измените во техничките документи на „WADA“.
„Дојде до измени во техничкиот документ на „WADA“ (TD2027MRL). Иако овие измени не се применуваат ретроактивно, тие значат дека концентрацијата на мелдониум пронајдена во примерокот на господинот Мудрик денес не би се сметала за спорна, ниту би претставувала прекршување на антидопинг правилата“, се наведува во соопштението на ФА.
Од Сојузот додадоа:
„Господинот Мудрик повеќе не е под суспензија и може веднаш да се врати на натпреварите.“
Што се случи?
Мудрик последен пат настапи за Челси на 28 ноември 2024 година, во победата над Хајденхајм (2:0) во Конференциската лига, додека натпреварот против Астон Вила на 1 декември го проследи од клупата. Потоа повеќе не беше дел од тимот, а тогашниот тренер Енцо Мареска неговото отсуство го објаснуваше со болест.
Фудбалската асоцијација на Англија привремено го суспендираше на 17 декември, откако рутински тест на урина покажа присуство на недозволена супстанца, а официјалното обвинение беше поднесено во јуни 2025 година. Украинецот веќе во недела ќе отпатува за Хонг Конг, каде што повторно ќе му се приклучи на тимот.
„Ова од самиот почеток беше исклучително тежок период за Миша, и професионално и приватно. Среќни сме што случајот е затворен и што веднаш може да му се врати на фудбалот“, порачаа од Челси.
Платен речиси 100 милиони евра
Михајло Мудрик пристигна во Челси во јануари 2023 година од украинскиот Шахтар, по голема битка со ривалот Арсенал. Вредноста на трансферот изнесуваше 70 милиони евра, со можност за дополнителни 30 милиони евра преку бонуси. Неговиот договор со лондонскиот клуб важи до 2031 година. Според „Transfermarkt“, во моментов нема пазарна вредност поради претходната суспензија.
Мудрик досега за Челси одигра 73 натпревари, на кои постигна 10 голови и забележа 11 асистенции. Тој беше стандарден репрезентативец на Украина и една од најголемите ѕвезди на националниот тим сè до суспензијата, а во 25 настапи постигна три гола и запиша пет асистенции.
