Планот на претседателот на ФИФА, Џани Инфантино, да основа нова компанија и дел од сопственоста над највредните натпреварувања во светскиот фудбал да им го продаде на приватни инвеститори, ги предизвика првите сериозни реакции. Откако британскиот „The Times“ ги објави деталите за проектот што би можел да го промени начинот на управување со Светското првенство и Светското клупско првенство, пристигна и остар одговор од УЕФА.
Европската куќа на фудбалот соопшти дека ваквиот потег би претставувал опасен преседан и порача дека иднината и управувањето со фудбалот не смеат да се претворат во предмет на трговија. Во соопштението се наведува дека целата фудбалска заедница треба сериозно да ги сфати плановите што ѝ се припишуваат на ФИФА.
Според наводите на „The Times“, Инфантино сака да формира нова компанија која би управувала со комерцијалните права на најважните натпреварувања на ФИФА. Планот предвидува ФИФА да го задржи мнозинскиот сопственички удел, додека меѓу 20 и 30 проценти од акциите би им биле продадени на приватни инвеститори за повеќе милијарди долари. Остатокот би бил распределен меѓу сите 211 национални фудбалски сојузи, а самиот Инфантино, по истекот на претседателскиот мандат, би можел да ја преземе функцијата комесар или извршен директор на новата компанија.
Таквото сценарио предизвика сериозна загриженост во УЕФА, која смета дека приватниот капитал би можел да влијае врз носењето клучни одлуки за иднината на светскиот фудбал.
„Со ова е помината границата што управувачките институции во фудбалот никогаш не би смееле да ја преминат. УЕФА ова го сфаќа исклучително сериозно. Така треба да постапи и секој национален фудбалски сојуз. Така треба да постапи и секој учесник во фудбалот – лигите, клубовите, играчите, навивачите, владите и сите на кои им е грижа за иднината на оваа игра. Душата и управувањето со фудбалот не се имот со кој може да се тргува – особено кога воопшто не е јасно кој би профитирал финансиски од тоа. Никој од нас не е сопственик на фудбалот. ФИФА нема право да го продава“.
Со ова соопштение, УЕФА јасно става до знаење дека смета оти евентуалната приватизација на дел од комерцијалните права на Светското првенство би претставувала опасен преседан, кој би можел да им ја отвори вратата на интересите на инвестициските фондови и големите финансиски компании во одлучувањето за најважните прашања во светскиот фудбал.
Доколку Инфантино продолжи со реализацијата на проектот, се очекува токму отпорот на УЕФА и европските фудбалски сојузи да претставува една од најголемите пречки за спроведување на планот, кој веќе предизвика бројни полемики низ целиот фудбалски свет.
