Девет водечки компании од светот на криптовалутите и финансиите, меѓу кои „Strategy“, „BlackRock“, „Coinbase“, „Fidelity Digital Assets“ и „Galaxy“, го основаа „Bitcoin Security Consortium“, иницијатива која во следните три години ќе инвестира вкупно 15 милиони долари во зајакнување на долгорочната безбедност на „Bitcoin“.
Првиот приоритет на новиот конзорциум ќе биде развојот на таканаречената постквантна криптографија, односно технологии кои во иднина би можеле да го заштитат „Bitcoin“ од потенцијални напади на моќни квантни компјутери.
Членовите на конзорциумот нагласуваат дека денешните квантни компјутери сè уште не се способни да ја загрозат енкрипцијата на „Bitcoin“, но сметаат дека подготовките мора да започнат многу пред таквата технологија да стане реалност.
Средства за истражувања, но без влијание врз развојот на мрежата
Од конзорциумот порачуваат дека нема да управуваат со развојот на „Bitcoin“, ниту ќе наметнуваат промени во неговиот протокол, туку секоја компанија самостојно ќе ги финансира програмерите, истражувачите и непрофитните организации кои работат на унапредување на безбедноста на мрежата.
Директорот на компанијата „Strategy“, Фонг Ле, истакна дека долгорочните инвеститори имаат интерес „Bitcoin“ да остане безбеден и доверлив и за идните генерации, додека од „BlackRock“ најавија дополнително финансирање на програмерите кои работат на развојот на „Bitcoin Core“.
Подготовки за идните предизвици
Основањето на конзорциумот доаѓа во момент кога експертите сè повеќе дискутираат за можниот ефект што квантните компјутери би можеле да го имаат врз современата криптографија, иако сè уште не постои консензус кога таквата закана би можела да стане реалност.
Поради тоа, сè поголем број компании и истражувачки тимови развиваат решенија за премин кон побезбедни криптографски методи, со цел „Bitcoin“ и во следните децении да остане отпорен на технолошките предизвици, наведува „Crypto“.
