Маслиновото масло е вистинско нутритивно богатство, богато со мононезаситени масти и моќни антиоксиданси. Докажано е дека редовната употреба на овој заштитен знак на Медитеранот и неговите кујни го штити срцето, ги намалува воспаленијата и го подобрува варењето, а само неколку капки дневно можат да го променат и телото и духот. Оние кои пораснале во мирисот на маслинките ќе ви откријат дека ова течно злато треба да биде дел од секое утро, а еве и зошто...
Маслиново масло на празен стомак? Наутро? Можеби сте се намуртиле на таа идеја. Но, велат дека воопшто не е лоша, напротив. Дека само една лажица може да направи чуда: да го подигне вашето здравје на повисоко ниво, да ги подобри физичките перформанси и варењето, да го зајакне имунолошкиот систем, да направи кожата и косата да заблескаат со нова енергија и виталност. Овие ефекти, секако, не се постигнуваат преку ноќ. Неопходна е континуираност.
Најквалитетно и најприродно е екстра девственото маслиново масло, кое се добива со прво ладно цедење. Содржи многу корисни соединенија, како што се полифеноли и антиоксиданси. Сепак, важно е да се запомни дека станува збор за висококалорична намирница – една лажица (10 до 12 грама) содржи околу 90 калории. Ако тоа ви е премногу, започнете го утринскиот ритуал со мала кафена лажичка, а не со голема супена, додека организмот не се навикне.
Предностите се многубројни. Ако редовно земате маслиново масло на празен стомак, веќе по неколку дена ќе забележите дека дигестивниот тракт работи подобро, како и дека варењето е полесно и побрзо. Причината е тоа што маслото има благо лаксативно дејство, но малата количина е безопасна и корисна за цревата.
Второ, незаситените масни киселини го поддржуваат растот на добрите цревни бактерии и го стимулираат празнењето. Умереноста е, како и во сè, клучна, а треба да се обрне внимание и на балансирана исхрана богата со влакна.
Замастен црн дроб има околу 25% од светската популација, односно секој четврти човек, а многумина не се ни свесни за тоа. Оваа состојба може да биде предизвикана од прекумерна телесна тежина, недостаток на физичка активност или хронично воспаление. Маслиновото масло има антиинфламаторни и антиоксидативни својства, а една студија покажала дека животните со оштетен црн дроб на кои им било давано покажале значително зголемување на антиоксидативните ензими и подобрување на здравјето на црниот дроб.
Една од основните намирници во многу домаќинства е добра и за кардиоваскуларниот систем. Олеинските киселини што ги содржи го штитат срцето, го намалуваат нивото на холестерол и ги одржуваат крвните садови еластични и флексибилни. Маслиновото масло се состои од 70 проценти мононезаситени и 10 проценти полинезаситени масни киселини, а оваа комбинација помага во намалување на штетниот LDL холестерол и го намалува ризикот од создавање наслаги во артериите.
Истражувањата покажуваат дека маслиновото масло може да помогне во третирањето на предвремените знаци на стареење и оштетувањата на кожата предизвикани од сончевите зраци, па затоа сè почесто се користи и во козметичката индустрија. Содржи биотин, кој ја зајакнува и ја штити косата и ноктите, а можете и директно да го нанесувате на овие делови.
