Уредот во боја "Cosmic Orange" е избран како симбол на американските технолошки иновации на 21 век, а во апликацијата „Notes“ се зачувани дигитални записи што треба да им прикажат на идните генерации како изгледал секојдневниот живот во 2026 година.

Проектот е дел од националната иницијатива „America250“, која обединува експонати од сите 50 сојузни држави и шест американски територии во чест на 250-годишнината од потпишувањето на Декларацијата за независност.

Капсула дизајнирана да издржи 250 години

Временската капсула ја конструираа експерти од „NIST“ (Националниот институт за стандарди и технологија на САД), користејќи специјален не’рѓосувачки челик и запечатување со индиум, за содржината да остане заштитена од влага и корозија во текот на наредните два и пол века.

Освен „iPhone“, во капсулата се наоѓаат и бројни историски и културни предмети, меѓу кои се парче платно од авионот на браќата Рајт, перо од легендарниот орел Олд Ејб, како и одговори од вештачката интелигенција „Claude“ за иднината на Калифорнија, заедно со голем број експонати што ја претставуваат американската историја и современото општество.

Капсулата е закопана во Националниот историски парк „Independence“ во Филаделфија, недалеку од Ѕвончето на слободата и Салата на независноста, местото каде што во 1776 година била усвоена Декларацијата за независност на САД.

Организаторите истакнуваат дека проектот не е замислен само како збирка на историски предмети, туку и како порака до идните генерации за тоа како Американците живееле, создавале и ја развивале технологијата на почетокот на 21 век.

Свеченото отворање на капсулата е планирано за 4 јули 2276 година, кога Соединетите Американски Држави ќе одбележат 500 години од своето основање.