Аргентина приреди спектакуларен пресврт и обезбеди пласман во четвртфиналето на Светското првенство, откако го совлада Египет со 3:2, иако на средината од второто полувреме имаше негатива од два гола.
Аргентина уште од самиот почеток имаше поголем посед на топката и го контролираше ритамот на натпреварот, но не успеваше посериозно да го загрози противничкиот гол во воведните минути. Првата голема шанса ја искористи Египет, кој во 15. минута поведе. По центаршутот на Марван Атија, највисок во скокот беше Јасер Ибрахим, кој со удар со глава го совлада аргентинскиот голман за 1:0.
Шанса за брзо израмнување Аргентина доби во 19. минута, кога Николас Таљафико избори пенал по прекршокот на Хајсем Хасан. Одговорноста ја презеде Лионел Меси, но египетскиот голман Мустафа Шобир го прочита неговиот удар и со фантастична интервенција ја сочува предноста на својот тим.
Тоа беше втор промашен пенал на Меси на ова Светско првенство, откако не беше прецизен ниту во групната фаза против Австрија.
До крајот на првото полувреме Аргентина продолжи да напаѓа. Алексис Мек Алистер пропушти одлична можност кога неговиот удар со глава од непосредна близина го одбра расположениот Шобир, кој потоа го запре и обидот на Хулијан Алварез.
Во 32. минута, Меси беше најблиску до погодок од слободен удар, но ја погоди стативата, додека египетскиот голман и во таа ситуација беше многу блиску до одбрана. Во финишот на полувремето се обидоа уште Меси и Алварез со удари од далечина, но без успех.
Така, Египет на пауза замина со минимална предност.
Аргентина офанзивно го отвори второто полувреме. Веќе во 47. минута, Лионел Меси одлично го проигра Родриго Де Пол, но неговиот удар од работ на шеснаесетникот повторно го запре извонредниот Мустафа Шобир.
Во 58. минута, Египет изгледаше како да ја удвои предноста. Мохамед Салах повлече брза контра и го проигра Мустафа Зико, кој рутински ја затресе мрежата на Аргентина. Сепак, по VAR проверката, погодокот беше поништен поради прекршок над Лисандро Мартинез во почетокот на акцијата.
Само неколку минути подоцна, Египет повторно организираше молскавична контра, а овој пат немаше спас за Аргентина. Салах уште еднаш беше иницијатор на нападот, го проигра Хајсем Хасан, а тој несебично му асистираше на Зико, кој погоди во празната мрежа за големи 2:0.
Кога изгледаше дека Египет е на чекор до сензација, Аргентина брзо возврати. Лионел Меси прецизно центрираше од прекин, а Кристијан Ромеро беше највисок во скокот и со глава намали на 2:1, враќајќи им надеж на Гаучосите во завршницата на натпреварот.
По голот на Ромеро, Гаучосите продолжија со жесток притисок кон последната линија на Египет. Во 82. минута, Лионел Меси повторно ја покажа својата класа, внесе голема паника во противничкиот шеснаесетник и идеално го проигра Лаутаро Мартинез, кој од одлична позиција шутираше покрај голот.
Само една минута подоцна следуваше нов налет на Аргентина, а овој пат немаше спас за Египќаните. Лионел Меси ја презеде одговорноста и со силен удар ја затресе мрежата за 2:2, искупувајќи се за промашениот пенал од првото полувреме.
Кога се чинеше дека победникот ќе биде решен во продолженијата, следуваше ерупција од воодушевување меѓу аргентинските навивачи. Во втората минута од судиското продолжение, Лаутаро Мартинез нафрли од десната страна, а Енцо Фернандез одлично реагираше и со удар со глава погоди за 3:2, комплетирајќи го големиот пресврт на Гаучосите.
Така, Аргентина од негатива од два гола стигна до една од најголемите победи на овогодинешниот Мундијал. По промашениот пенал и бројните пропуштени шанси, Лионел Меси ја предводеше својата селекција до големото враќање, додека Енцо Фернандез со голот во 92. минута го завери пласманот на Аргентина меѓу осумте најдобри репрезентации во светот.
Денес
