Филмот „Misaligned“ ќе биде првиот дел од франшизата сместена во дигиталниот свет „Tillyverse“
AI ликот Тили Норвуд, која се претставува како идна филмска ѕвезда, треба да ја добие главната улога во нов долгометражен филм создаден со помош на вештачка интелигенција.
Тили Норвуд, AI лик со бел тен, кафеава коса и кафени очи, беше претставена како актерка минатата година на Филмскиот фестивал во Цирих. Ликот е во сопственост на продукциската куќа „Particle 6“, а нејзиното претставување предизвика бројни критики во филмската индустрија, меѓу кои се истакнаа актерките Емили Блант и Наташа Лион.
Како што пренесува „Variety“, Норвуд ќе „глуми“ во својот прв филм со наслов „Misaligned“, кој е замислен како прв дел од франшизата сместена во таканаречениот „Tillyverse“, надреален дигитален свет. Приказната ја следи Тили, која е наведена од заводлив бот да развие човечки желби, нагони и амбиции.
Од компанијата „Particle 6“ истакнуваат дека филмот ќе биде „хибридна продукција“, во која човечкиот креативен придонес ќе биде комбиниран со современата технологија.
„Филмот дефинитивно ќе биде духовит, хаотичен и свесен за самиот себе – токму како Тили“, изјави Ван дер Велден од „Particle 6“ за „Variety“, додавајќи дека зад целиот проект сепак се крие подлабока приказна за идентитетот, глумата и човечките стравови од вештачката интелигенција.
Тили Норвуд моментално може да се види на „Instagram“, каде што се појавува во кратки AI-генерирани скечеви кои сатирично обработуваат теми поврзани со „Spotify“, овогодинешниот Филмски фестивал во Кан и актерските демо-снимки.
Компанијата „Particle 6“ во март го опиша „Tillyverse“ како „динамичен, постојано еволуирачки дигитален универзум во кој Тили и новата генерација AI ликови ќе живеат, ќе соработуваат и ќе ги градат своите кариери“.
Вештачката интелигенција и понатаму предизвикува поделени мислења во Холивуд, а нејзината употреба беше критикувана од бројни филмски автори и јавни личности.
Денес
