Фудбалската репрезентација на Босна и Херцеговина го заврши настапот на Светското првенство, откако загуби од Соединетите Американски Држави со 2:0 во шеснаесетинафиналето.
Разочарувањето по елиминацијата не го криеја ниту фудбалерите, ниту навивачите, а меѓу оние што јавно ја изразија својата поддршка беше и Амра Џеко, сопругата на капитенот Един Џеко.
Таа на социјалните мрежи сподели емотивна порака од инфлуенсерот Ади Бебаниќ, која брзо привлече големо внимание.
„Како воопшто се простуваш од нешто што не сакаш да заврши? Вечерва топката запре. Семафорот го кажа своето. Првенството заврши.
Но, најубавото што ни го подаривте не завршува вечерва. Ви благодарам што од една мала земја направивте центар на светот. Што направивте името на Босна и Херцеговина да се изговара со почит. Што покажавте дека една држава не мора да биде голема за да биде огромна.
Ние сме мала земја. Земја што премногу пати плачела. Земја од која повеќе се заминува отколку што се враќа. Земја што премногу често се дели, се расправа и заборава колку вреди.
А потоа дојдовте вие и за само неколку недели го направивте она што со години никому не му успеа. Ни помогнавте да ги заборавиме разликите, да не прашуваме кој е кој, да не се делиме, туку да бидеме само луѓе што дишат со исти гради и го сакаат истото знаме“, стои во пораката што ја сподели Амра Џеко.
Покрај емотивната објава, таа сподели и неколку фотографии и видеа од натпреварот, кои ќе останат спомен на настапот на репрезентацијата на Светското првенство.
Амра и Един Џеко се венчаа во тајност во 2016 година. Истата година ја добија ќерката Уна, а една година подоцна им се роди синот Дани. Во 2020 година се роди ќерката Далија, а во 2023 година семејството ја доби и најмладата ќерка Хана. Амра од претходниот брак ја има и ќерката Софија.
