Одјава од еден од најсаканите шпански фудбалери: Има приказни кои се бесконечни како бројот 8

Касорла доби стоечки овации од сите стадиони во Шпанија и беше еден од најсканите фудбалери во последните неколку години, не само поради фудбалската магија која ја поседува, туку и поради тешкиот пат кој мораше да го изоди.

Некогашната ѕвезда на Арсенал надмина неколку тешки операции и избегна ампутација на ногата, па откако го остави хоророт зад себе, повторно заигра на највисоко ниво и реши да се пензионира во матичниот Овиедо.

Касорла ова попладне отрки дека последниот фудбалски танц е веќе зад него, а емотивната порака која ја испрати не остави никого рамнодушен во фудбалскиот клуб Овиедо.

– Мојата приказна не започна на голем стадион или под големи рефлектори, започна на обичен терен, со топка и со желба на едно мало момче кое само сакаше да игра фудбал. Малку по малку, си го исковав својот пат. Доживеав прекрасни работи… Исто така, преживеав неочекувани и тешки моменти. Но, никогаш не престанав да се обидувам. И на крајот, се вратив, не за да затворам некое поглавје, туку за да го оживеам жарот во себе повторно.

– Се потсетив зошто почнав да играм фудбал, а сега, кога сè исчезнува, кога копачките се закачени на клин, а бучавата се претвора во тишина, сè си доаѓа на свое место. Крајот мораше да биде дома, на истото место каде што започна магијата. Бидејќи некои приказни не завршуваат; тие остануваат засекогаш. Како бројот 8, како симболот за бесконечност, – порача Касорла кој после сите потешкотии кои ги надмина, може да биде горд што се пензионира на 41-годишна возраст.