И „Xbox“ и „Nintendo“ веќе извесно време ги насочуваат корисниците кон дигиталните игри.
„Sony“ соопшти дека „PlayStation“ целосно преминува на дигитален формат, при што производството на физички дискови со игри ќе биде прекинато почнувајќи од јануари 2028 година. По овој датум, новите игри ќе можат да се купуваат исклучиво во дигитален формат преку „PlayStation Store“ и овластените продавници.
Од „Sony“ наведуваат дека оваа одлука е одговор на промените во трендовите и навиките на потрошувачите, бидејќи дигиталната продажба веќе одамна ја надминува продажбата на физички изданија. Минатата година, дистрибуцијата на физички игри учествувала со само три проценти од приходите на „PlayStation“, а фактот што „PS5 Pro“ беше претставен во 2024 година без читач за дискови беше јасен показател за правецот во кој се движи компанијата.
Неизбежноста на ваквиот развој беше очигледна уште кога „Rockstar“ објави дека се откажува од дисковите за „GTA 6“, а овие вести практично ги уништуваат сите надежи дека станувало збор само за изолиран случај. Физичките дискови можеби се подобри за потрошувачите и за оние кои се грижат за зачувување на видеоигрите, но финансиската корист од дигиталниот модел за компании како „Sony“ е повеќе од очигледна.
„Xbox“ веќе подолго време се оддалечува од физичките медиуми, а дури и „Nintendo“, кој сè уште е доминантна сила кога станува збор за продажба на физички игри, очигледно ги насочува купувачите кон дигиталниот формат преку пониски цени и кертриџи со кодови (game-key) кои не ја содржат целата игра.
Збогувањето на „Sony“ со дисковите не е единствената новост поврзана со „PlayStation“. Компанијата истовремено најави и затворање на „PlayStation Store“ за платформите „PS3“ и „PS Vita“.
Откако продавниците ќе бидат затворени, повеќе нема да биде можно купување нови игри или дополнителна содржина за овие платформи, иако „Sony“ ќе им овозможи на корисниците и понатаму да ги преземаат своите претходно купени игри „во догледна иднина“.
На одредени пазари овие продавници ќе бидат затворени уште во август 2026 година, додека корисниците во САД ќе имаат рок до јули 2027 година да ги купат сите игри што сакаат да ги додадат во своите библиотеки.
„Свесни сме дека овие вести можат да ги разочараат играчите на „PS3“ и „PS Vita“, кои имаат посебно место во срцето за оваа генерација на гејминг“, соопшти „Sony“.
„„PS3“ и „PS Vita“ претставуваат важна ера во историјата на „PlayStation“, па затоа ова не беше лесна одлука за нас“, додаваат од компанијата.
