Украинскиот претседател Зеленски извести за сериозни загуби на руските сили и за притисокот што украинските операции го создаваат преку интерни руски документи добиени од разузнавачките служби.
Претседателот на Украина, Володимир Зеленски, во своето обраќање синоќа изјави дека Украина продолжува жестоко да реагира на руските напади и дека Москва трпи огромни загуби на окупираните територии.
Руската воена лојистика и самото присуство на окупаторите се сериозно загрозени, што, според него, е јасен сигнал дека Русија нема да се извлече со кражба на украинска земја. Зеленски нагласи дека акциите на Украина, вклучително и оние на Крим, се детално испланирани, но дека конечниот успех зависи од клучните одлуки на сојузниците од групата Г7, која ги обединува седумте најмоќни економии во светот.
„Нашите операции, вклучително и онаа поврзана со Крим, беа внимателно пресметани. Текот на операцијата целосно докажува: ако Украина го добие токму она што го разговаравме со нашите партнери во рамките на Г7 – а тоа зависи од нивната одлука – ние брзо ќе создадеме услови што ќе ја принудат Русија да избере мир“, рече Зеленски, додавајќи дека украинската армија во моментов успешно ги уништува целите што ги одржуваат воените напори на Русија.
Украинскиот претседател, исто така, откри дека разузнавачките служби дошле во посед на доверливи информации од самиот Кремљ што покажуваат дека стратегијата за притисок на Украина дава сериозни резултати.
„Дојдовме во посед на некои руски интерни документи што даваат вистински увид во тоа што се случува, директно од самиот окупатор. Руското раководство навистина чувствува огромен притисок од нашите тактики“, нагласи Зеленски.
Продолжувајќи го своето обраќање, тој ги наведе клучните руски воени и енергетски точки што биле нападнати од украинските сили, од кои некои се оддалечени повеќе од илјада километри од линијата на фронтот.
„Ги достигнуваме нивните арсенали. Значителна количина муниција за Балтичката флота беше уништена во близина на Санкт Петербург. Слични напади имаше и во други области. Напаѓаме воени производствени погони, како оние во Воронеж, кои произведуваат клучни делови за нивните ракети – истите ракети што Русите ги користат против нашите градови, села, енергетска инфраструктура и нашите животи. Друга цел што беше погодена беше воена фабрика во Чебоксари. Сè повеќе ја нарушуваме руската воена логистика. Исто така, потврдивме напади врз гасни постројки во регионот Оренбург. Тоа е повеќе од 1.200 километри од линијата на фронтот. Многу нафтени постројки низ Русија исто така беа цел. Комуникациските центри на руската војска, кои се стратешки клучни за нив, исто така беа погодени“, наведе украинскиот претседател.
Зеленски го заврши своето обраќање велејќи дека веќе издал нови, строги наредби до армијата и разузнавањето да продолжат со операциите. „Им наредив на нашите разузнавачи и војска да дејствуваат проактивно во врска со локациите што Русите ги користат за ескалација на војната“, заклучи тој.
