Реј Кнопик (31) и нејзиниот вереник Деклан Нори (31) од Канбера станале сопственици на трошна куќа во гратчето Троина, откако за време на пандемијата се пријавиле на јавен повик.

Двојката се запознала во Италија во 2018 година и вели дека веднаш почувствувала посебна поврзаност со сицилијанското место во кое се наоѓа куќата, пишува „The Sun“.

Сон роден за време на карантинот

По години планирање и неколку посети, парот сега се подготвува за реновирање на имотот, кој сака да го претвори во дом од соништата, но и во место што ќе ја слави нивната поврзаност со Италија. Тие проценуваат дека за обновата ќе бидат потребни најмалку 50.000 евра.

„Австралија за време на пандемијата беше целосно затворена. Не смеевме да излегуваме од домовите и бевме очајни затоа што не можевме да патуваме“, раскажала Реј, сопственичка на мала маркетинг-агенција.

„Деклан и јас се запознавме во Италија, која за нас има посебно значење. Имам и италијански корени и отсекогаш сакав повторно да се поврзам со тој дел од мојот идентитет. Учев италијански јазик и живеев таму извесно време, па поседувањето недвижнини во Италија отсекогаш беше мој сон“.

Затворени во домот за време на пандемијата, тие поминувале часови гледајќи патописни видеа на интернет. Во текот на своето истражување наишле на текст за италијански куќи што се продаваат за едно евро.

„Почнавме да гледаме видеа од луѓе кои со GoPro камери ги обиколуваат градовите. Постепено навлеговме во тој свет и почнавме да истражуваме мали места. Тогаш ја откривме Троина и наидовме на приказна за куќите што се продаваат за едно евро. Си помисливме: 'зошто да не се обидеме?'“, се присетила Реј.

Долг пат до победата

Во својата пријава тие детално ја опишале својата поврзаност со Италија и плановите за обновување на куќата.

„Италијански јазик почнав да учам кога имав 20 години, а извесен период поради студиите живеев во Фиренца. Сакав повторно да ја обновам врската со наследството на моите предци. Тие биле принудени да заминат во САД, каде што не биле добро прифатени, па затоа денес никој во моето семејство не зборува италијански“, објаснила таа.

Потоа следувал процес на селекција што траел околу една година и вклучувал бројни разговори со локалните власти.

„Неделите се претворија во месеци. Имаше интервјуа, гласовни пораки, видеоповици и многу прашања. А потоа, приближно една година подоцна, ни јавија: ‘Победивте. Дали сакате да дојдете и да ја погледнете куќата?’“ раскажала Реј.

Парот веднаш резервирал авионски билети и во јуни 2022 година отпатувал во Италија. Сепак, не ги воодушевила само куќата.

„Се возите низ долини во срцето на Медитеранот и одеднаш здогледувате замок на хоризонтот. Се искачувате сè повисоко додека не стигнете до градот. Беше апсолутно прекрасно. Кога времето е ведро, погледот се протега сè до морето. Уште пред да ни ја отворат вратата од куќата, одлучивме дека ќе ја купиме, само врз основа на патот што водеше до неа“, рекла Реј.

Вистинската приказна за куќите од едно евро

И покрај симболичната цена, Реј истакнува дека постои голема заблуда кога станува збор за италијанските куќи што се продаваат за едно евро. Многумина мислат дека таквите недвижности се практично бесплатни, не сфаќајќи колку пари и труд се потребни за да станат погодни за живеење.

„Суштината на целата идеја е да се оживеат малите места и повторно да се внесе живот во локалните заедници. Искрено, би ме изненадило ако некоја од тие куќи не бара сериозна обнова. Нашата куќа беше напуштена 50 или 60 години. Беше исчистена и обезбедена, но беше очигледно дека со децении никој не живеел во неа“, објаснила таа.

Парот првично проценил дека за обновата ќе потроши околу 50.000 евра, но со текот на времето нивните амбиции пораснале. Денес сакаат да создадат место за собирање на целото семејство, каде што ќе можат да уживаат во своите сицилијански корени, опкружени со уметност и убавина.

„На почетокот сакавме само да ја средиме доволно за да може да се живее во неа. Сега проектираме нешто што ќе биде целосно наше. Буџетот постојано се менува затоа што сфативме дека сакаме дом од соништата. Размислуваме за големи зафати, можеби дури и за уривање на задниот ѕид“, открила Реј.

Нов живот на Сицилија

Откако ја купиле куќата во 2022 година, парот редовно ја посетува Троина и истакнува дека локалните жители срдечно ги прифатиле.

„Тоа целосно ни го промени животот. Се спријателивме со голема група млади и амбициозни Сицилијанци кои навистина нè прифатија. Во август ќе се венчаме на Сицилија и таму ќе бидат триесетина наши нови пријатели. Имаме чувство дека станавме дел од заедницата“, рекла таа.

Иако куќата чинела само едно евро, Реј вели дека она што го добиле е многу повредно од парите.

„Сè започна како сон за време на карантинот. Денес тоа стана важен дел од нашите животи и од нашата заедничка иднина“, заклучила таа.